ഇന്ത്യന്‍ ക്രിക്കറ്റില്‍ ആരാധകര്‍ ഏറെയുള്ള സൂപ്പര്‍ താരമാണ് എം.എസ്. ധോണി. ആണ്‍പെണ്‍ വ്യത്യാസമില്ലാതെ ലക്ഷക്കണക്കിനുപേര്‍ ധോണിയെ ഇഷ്ടപ്പെടുന്നു. ഐപിഎല്ലില്‍ ചെന്നൈ സൂപ്പര്‍ കിംഗ്സിന്റെ ഒരു മത്സരത്തിനിടെ ഗാലറിയില്‍ ഉയര്‍ന്ന ബാനര്‍ ആ ഇഷ്ടത്തിന് അടിവരയിടുന്നതായിരുന്നു. 2018ലാണ് ധോണിയോടുള്ള ആരാധികയുടെ കടുത്ത പ്രണയം വെളിവാക്കുന്ന ബാനര്‍ ഗാലറിയില്‍ ഉയര്‍ന്നത്. അക്കുറി സൂപ്പര്‍ കിംഗ്സ് ഐപിഎല്‍ ജയിക്കുകയും ചെയ്തിരുന്നു.
‘ഭാവിയിലെ പങ്കാളി ക്ഷമിക്കുക. എല്ലായ്‌പ്പോഴും എന്റെ ആദ്യാനുരാഗം എ.എസ്. ധോണിയായിരിക്കും. ഞാന്‍ നിന്നെ സ്‌നേഹിക്കുന്നു മഹി’- എന്നായിരുന്നു സുന്ദരിയായ ആരാധിക ഉയര്‍ത്തിയ ബാനറിലുണ്ടായിരുന്നത്. ധോണിയുടെ ഭാര്യ സാക്ഷി ഗാലറിയില്‍ ഉണ്ടായിരുന്നപ്പോഴാണ് ആരാധിക ധോണിയോടുള്ള അടങ്ങാത്ത ഇഷ്ടം വെളിപ്പെടുത്തിയത്.
2005ല്‍ ആദ്യ ഏകദിന സെഞ്ച്വറി നേടിയതോടെയാണ് ധോണിയുടെ ആരാധകവൃന്ദം സജീവമാകാന്‍ തുടങ്ങിയത്. 2007 ട്വന്റി20 ലോക കപ്പിലും 2011 ഏകദിന ലോക കപ്പിലും ക്യാപ്റ്റന്‍ ധോണി ഇന്ത്യയെ ജേതാക്കളാക്കിയതോടെ ആരാധകരുടെ നിര പതിന്മടങ്ങ് വര്‍ദ്ധിച്ചു. ചെന്നൈ സൂപ്പര്‍ കിംഗ്സിനായി നേടിയ ഐപിഎല്‍ കിരീടങ്ങളും ധോണിയെ സച്ചിന്‍ ടെണ്ടുല്‍ക്കറിനോളം പോന്ന ഫാന്‍ ബേസുള്ള താരങ്ങളിലൊരാളാക്കി മാറ്റിയിരുന്നു.