ഐപിഎല് 15ാം സീസണിന് 26ന് കൊടിയേറും. ഉദ്ഘാടന മത്സരത്തില് നിലവിലെ ചാമ്പ്യന്മാരായ ചെന്നൈ സൂപ്പര് കിംഗ്സ് മുന് ചാമ്പ്യന്മാരായ കൊല്ക്കത്ത നൈറ്റ് റൈഡേഴ്സിനെയാണ് നേരിടും. എന്നാല് ഇരുടീമിനും താരങ്ങളുടെ പരിക്ക് തലവേദനയായിരിക്കുകയാണ്.
സിഎസ്കെ നിരയില് 14 കോടി കൊടുത്ത് സ്വന്തമാക്കിയ ദീപക് ചഹാര് ഉണ്ടായിരിക്കില്ലെന്ന് ഉറപ്പാണ്. താരത്തിന്റെ പരിക്ക് ഭേദമാകാന് ഇനിയും സമയംപിടിക്കുമെന്നാണ് വിവരം. അതോടൊപ്പം സിഎസ്കെ നിരയില് മൊയിന് അലി ആദ്യ മത്സരത്തില് ഉണ്ടായിരിക്കുമോ എന്ന് സംശയമാണ്.
വിസാ പ്രശ്നങ്ങളെത്തുടര്ന്ന് മോയിന് അലി ഇതുവരെ ഇന്ത്യയിലേക്കെത്തിയിട്ടില്ല. ഇനി എത്തിയാലും ക്വാറന്റെയും പരിശീലനവും കഴിഞ്ഞ് ആദ്യ മത്സരം കളിക്കുക പ്രയാസമാണ്. ദക്ഷിണാഫ്രിക്കയുടെ ഡ്വെയ്ന് പ്രിട്ടോറിയസും കെകെആറിനെതിരെ സിഎസ്കെ നിരയിലുണ്ടാവില്ല. നിലവില് ബംഗ്ലാദേശിനെതിരായ പരമ്പരയിലാണ് അദ്ദേഹമുള്ളത്. അതിനാല് ടീമിനൊപ്പം ചേരുന്നത് വൈകും.
കെകെആര് നിരയില് ആരോണ് ഫിഞ്ച് ആദ്യ മത്സരത്തിന് ഉണ്ടാവില്ല. പാകിസ്ഥാന്-ഓസ്ട്രേലിയ പരമ്പരയിലാണ് ഫിഞ്ചുള്ളത്. ഇതിനു ശേഷമേ ഫിഞ്ച് കെകെആറിനൊപ്പം ചേരൂ. ഓസീസ് സ്റ്റാര് പേസ് ഓള്റൗണ്ടര് പാറ്റ് കമ്മിന്സും ആദ്യ മത്സരത്തിനുണ്ടാവില്ല. പാകിസ്താന് പരമ്പര തന്നെയാണ് കമ്മിന്സിന്റെയും പ്രശ്നം.
ന്യൂസിലാന്ഡ് പേസര് ടിം സൗത്തിയും ആദ്യ മത്സരത്തില് കെകെആര് നിരയിലുണ്ടാവില്ല. അദ്ദേഹത്തിന്റെ വിവാഹം മാര്ച്ച് 19നായിരുന്നു. അതിന് ശേഷം അദ്ദേഹം കുടുംബത്തോടൊപ്പമാണുള്ളത്. ഇന്ത്യയിലേക്കെത്താന് വൈകുമെന്നാണ് അറിയുന്നത്.