ഐപിഎല്‍ 15ാം സീസണിന് മുമ്പായി വരാനിരിക്കുന്ന താര ലേലത്തില്‍ ഇന്ത്യന്‍ താരം കെഎല്‍ രാഹുല്‍ ചരിത്രം സൃഷ്ടിക്കുമെന്ന് ആകാശ് ചോപ്ര. താരലേലത്തില്‍ ഏറ്റവും കൂടുതല്‍ തുകയ്ക്ക് വിറ്റുപോകുന്ന താരം രാഹുലായിരിക്കുമെന്നാണ് ചോപ്രയുടെ പ്രവചനം. 20 കോടിക്ക് മുകളില്‍ രാഹുലിന് ലഭിക്കുമെന്നാണ് അദ്ദേഹം അഭിപ്രായപ്പെട്ടത്.
‘കെ എല്‍ രാഹുല്‍ ലേലത്തിലേക്കെത്തിയാല്‍ നിലവിലെ പ്രതിഫല സംവിധാനങ്ങളൊക്കെ മാറ്റിമറിക്കപ്പെട്ടേക്കും. താരലേലത്തിലെ ഏറ്റവും വിലപിടിപ്പുള്ള താരമായി അവന്‍ മാറും. 20 കോടിയിലധികം ലഭിച്ചേക്കും’ ആകാശ് ചോപ്ര പറഞ്ഞു.
നിലവില്‍ പഞ്ചാബ് കിംഗ്സ് നായകനാണ് രാഹുല്‍. ബാറ്റിംഗില്‍ തിളങ്ങുന്നുണ്ടെങ്കിലും പക്ഷേ ക്യാപ്റ്റന്‍സിയില്‍ വന്‍ പരാജയമാണ് താരം. അതിനാല്‍ രാഹുല്‍ പഞ്ചാബ് വിടുമെന്നാണ് റിപ്പോര്‍ട്ട്. പുതിയ രണ്ട് ടീമുകള്‍ കൂടി വരുന്നതോടെ ബാറ്റിംഗില്‍ മിന്നിക്കുന്ന രാഹുലിന്റെ ഡിമാന്റ് ഉയര്‍ത്തും.
2018 മുതലുള്ള എല്ലാ സീസണിലും 550 റണ്‍സില്‍ കൂടുതല്‍ നേടാന്‍ രാഹുലിനായിട്ടുണ്ട്. ഇന്ത്യയുടെ ഓപ്പണറെന്ന നിലയിലും സ്ഥിരതയാര്‍ന്ന പ്രകടനമാണ് താരം കാഴ്ചവയ്ക്കുന്നത്. അവസാന അഞ്ച് ടി20യില്‍ നിന്ന് നാല് അര്‍ദ്ധ സെഞ്ച്വറികള്‍ രാഹുല്‍ നേടി.