ഇന്നലെ നടന്ന ഒറ്റ മത്സരത്തിലൂടെ ഐപിഎല്‍ ലോകത്ത് ഹീറോയായിരിക്കുകയാണ് ആര്‍സിബി ബാറ്റ്‌സ്മാന്‍ ശ്രീകര്‍ ഭരത്. അവസാന ബോളില്‍ ജയിക്കാന്‍ 5 റണ്‍സ് വേണമെന്നിരിക്കെ ഡല്‍ഹി പേസര്‍ ആവേശ് ഖാനെ സിക്സിന് പറത്തിയാണ് ഭരത് ആര്‍സിബിയുടെ വിജയനാകനായത്. ഇപ്പോഴിത അവസാന ഓവറില്‍ ക്രീസില്‍ സംഭവവിച്ച കാര്യങ്ങള്‍ വെളിപ്പെടുത്തിയിരിക്കുകയാണ് താരം.
‘മാക്‌സ്‌വെല്‍ നല്‍കിയ ആത്മവിശ്വാസമാണ് എന്നെ തുണച്ചത്. അവസാന മൂന്ന് പന്ത് നേരിടുന്നതിന് മുന്‍പ് സ്ട്രൈക്ക് കൈമാറണോ എന്ന് ഞാന്‍ മാക്‌സ്‌വെല്ലിനോട് ചോദിച്ചു. എന്നാല്‍ ‘വേണ്ട, നിനക്ക് ഫിനിഷ് ചെയ്യാനാവും’ എന്നാണ് മാക്‌സ്‌വെല്‍ പറഞ്ഞത്. അത് എനിക്ക് ഒരുപാട് ആത്മവിശ്വാസം നല്‍കി.’
‘അടുത്ത പന്ത് എങ്ങനെയാവും എന്നതിലേക്ക് മാത്രമായിരുന്നു എന്റെ ഫോക്കസ്. ഒരുപാട് കാര്യങ്ങള്‍ ചിന്തിച്ചു കൂട്ടുന്നതിന് പകരം കാര്യങ്ങള്‍ ഞാന്‍ ലളിതമായി കണ്ടു. ടീം എന്ന നിലയില്‍ ആ സാഹചര്യം വിജയകരമായി മറികടക്കാനും ഞങ്ങള്‍ക്കായി. ബാറ്റിംഗ് പൊസിഷനില്‍ എവിടെ വേണമെങ്കിലും ഞങ്ങള്‍ക്ക് കളിക്കാം. ടീം മാനേജ്മെന്റ് അക്കാര്യം വ്യക്തമാക്കിയിട്ടുണ്ട്. വെല്ലുവിളി ഏറ്റെടുക്കാന്‍ എല്ലാവരും തയ്യാറാണ്’ ഭരത് പറഞ്ഞു.
മത്സരത്തില്‍ ഭരത് 52 പന്തില്‍ മൂന്ന് ഫോറിന്റെയും നാല് സിക്സിന്റെയും അകമ്പടിയില്‍ 78 റണ്‍സെടുത്ത് പുറത്താകാതെ നിന്നു. മാക്‌സ്‌വെല്‍ 33 പന്തില്‍ 51 റണ്‍സെടുത്ത് ഭരതിന് പിന്തുണ നല്‍കി. ജയത്തോടെ ആര്‍സിബി 18 പോയിന്റുമായി മൂന്നാം സ്ഥാനത്ത് നിലയുറപ്പിച്ചു. ഡല്‍ഹി (20 പോയിന്റ്) ഒന്നാം സ്ഥാനം ഉറപ്പിച്ചു. സ്‌കോര്‍: ഡല്‍ഹി- 164/5 (20 ഓവര്‍). ബാംഗ്ലൂര്‍- 166/3 (20).