കൈവിട്ടെന്ന് രാജസ്ഥാന് ഉറപ്പിച്ച മത്സരം അവസാന ഓവറില് തിരിച്ച് പിടിച്ച യുവ പേസര് കാര്ത്തിക് ത്യാഗിയെ പ്രശംസകള് കൊണ്ട് മൂടി ക്രിക്കറ്റ് ലോകം. ടി20 ക്രിക്കറ്റിന്റെ ചരിത്രത്തില് കണ്ടതില് വെച്ച് ഏറ്റവും മികച്ച അവസാന ഓവര് എന്നാണ് ദക്ഷിണാഫ്രിക്കന് മുന് പേസര് ഡെയ്ല് സ്റ്റെയ്ന് ത്യാഗിയുടെ പ്രകടനത്തെ വിശേഷിപ്പിച്ചത്.
ബ്രെറ്റ് ലീ എന്നാണ് മത്സരത്തിന് ശേഷം തങ്ങളുടെ വിജയ ശില്പ്പിയെ സഞ്ജു സാംസണ് വിശേഷിപ്പിച്ചത്. ‘എന്തൊരു ഓവറായിരുന്നു കാര്ത്തിക് ത്യാഗി. അത്രയും സമ്മര്ദം നിറഞ്ഞ ഘട്ടത്തില് കൂളായി നിന്ന് ജോലി പൂര്ത്തിയാക്കി. ഹൃദയഹാരിയായിരുന്നു’ എന്നാണ് ഇന്ത്യന് സൂപ്പര് പേസര് ജസ്പ്രീത് ബുംമ്ര ട്വിറ്ററില് കുറിച്ചത്.
പഞ്ചാബിന് ജയിക്കാന് അവസാന ഓവറില് 4 റണ്സ് മാത്രം മതിയെന്ന് നില്ക്കെയാണ് കാര്ത്തിക് ത്യാഗി കളി രാജസ്ഥാന്റെ വരുതിയിലാക്കിയത്. ആ ഓവറില് വെടിക്കെട്ട് ബാറ്റ്സ്മാന്മാരായ നിക്കോളാസ് പൂരന്, ദീപക് ഹൂഡ എന്നിവരെ മടക്കിയ ത്യാഗി ഒരു റണ് മാത്രമാണ് വഴങ്ങിയത്.