ഇന്ത്യക്കെതിരായ രണ്ടാം ക്രിക്കറ്റ് ടെസ്റ്റ് നാളെ മുംബൈയില് ആരംഭിക്കാനിരിക്കെ, വെല്ലുവിളിച്ച് കിവി പേസര് ടിം സൗത്തി. ഇന്ത്യന് മധ്യനിരയിലെ പുത്തന് താരോദയമായ ശ്രേയസ് അയ്യരെ തളയ്ക്കാന് പദ്ധതികളുണ്ടെന്നാണ് സൗത്തി പറഞ്ഞത്.
അസാധാരണ ബാറ്റിംഗാണ് ശ്രേയസ് അയ്യര് പുറത്തെടുത്തത്. അരങ്ങേറ്റത്തില് അത്രയും ആത്മവിശ്വാസത്തോടെ ബാറ്റ് ചെയ്ത ശ്രേയസിന്റെ പ്രകടനം ഉശിരനായിരുന്നു. പക്ഷേ, ശ്രേയസിനെ കുറിച്ച് അല്പ്പം അധികം വിവരങ്ങള് ഇപ്പോള് നമുക്ക് അറിയാം. സ്ലോ പിച്ചില് ഷോര്ട്ട് ബോളുകളിലൂടെ ബാറ്ററെ നേരിടുന്നത് എളുപ്പമല്ല. ശ്രേയസിനെ മെരുക്കാനുള്ള പദ്ധതികള് ന്യൂസിലന്ഡ് പരിശോധിക്കും- സൗത്തി പറഞ്ഞു.
അടുത്ത 24 മണിക്കൂറിനുള്ളില് കെയ്ന് വില്യംസണും ഗാരി സ്റ്റെഡും കൈക്കൊള്ളേണ്ട തീരുമാനങ്ങളുണ്ട്. മുംബൈയിലെ മോശം കാലാവസ്ഥ മൂലം നമുക്ക് പരിശീലിക്കാനായിട്ടില്ല. വില്യംസണും സ്റ്റെഡും പിച്ച് പരിശോധിച്ച ശേഷമേ തീരുമാനങ്ങള് എടുക്കാന് സാധിക്കൂവെന്നും സൗത്തി കൂട്ടിച്ചേര്ത്തു.