ന്യൂസിലന്‍ഡിനെതിരായ ടെസ്റ്റ് ക്രിക്കറ്റ് പരമ്പരയിലെ രണ്ടാം മത്സരത്തില്‍ യുവ പേസര്‍ മുഹമ്മദ് സിറാജ് കളിക്കാന്‍ സാധ്യതയുണ്ടെന്ന് മുന്‍ വിക്കറ്റ് കീപ്പര്‍ ദീപ് ദാസ്ഗുപ്ത. ഇഷാന്ത് ശര്‍മ്മ ഒഴിവാക്കപ്പെട്ടേക്കുമെന്നും ദാസ്ഗുപ്ത പറഞ്ഞു.
കുറച്ച് മുന്‍പ് സിറാജ് ഗ്രൗണ്ടില്‍ പന്തെറിയുന്നത് കണ്ടു. സിറാജിന്റെ ബോളിംഗില്‍ കുഴപ്പമൊന്നുമില്ല. പന്തെറിയാത്ത കൈയിലാണ് സിറാജിന് പരിക്കേറ്റതെന്ന് കരുതുന്നു. അതിനാല്‍ അയാള്‍ കായികക്ഷമത വീണ്ടെടുക്കാന്‍ നല്ല സാധ്യതയുണ്ട്. അങ്ങനെയായാല്‍ ഇഷാന്തിന് പകരം സിറാജ് ടീമില്‍ ഇടംപിടിച്ചേക്കും- ദീപ് ദാസ്ഗുപ്ത പറഞ്ഞു.
ന്യൂസിലന്‍ഡിനെതിരായ ടി20 പരമ്പയ്ക്കുള്ള ഇന്ത്യന്‍ ടീമില്‍ സിറാജിനെ ഉള്‍പ്പെടുത്തിയിരുന്നു. എന്നാല്‍ സിറാജിന് പരിക്കേറ്റതോടെ ഹര്‍ഷല്‍ പട്ടേലിനെ ടീമിലെടുത്തു. രണ്ടാം ടെസ്റ്റിന് വേദിയൊരുക്കുന്ന മുംബൈയിലെ പിച്ചില്‍ സിറാജിന് മികച്ച പ്രകടനം കാഴ്ചവയ്ക്കാന്‍ കഴിയുമെന്നാണ് വിലയിരുത്തപ്പെടുന്നത്.