അരങ്ങേറ്റ ടെസ്റ്റില് തന്നെ സെഞ്ച്വറി നേടാന് സാധിച്ചതിനെ കുറിച്ച് മനസ് തുറന്ന് ഇന്ത്യന് താരം ശ്രേയസ് അയ്യര്. 75 റണ്സുമായി പുറത്താകാതെ നിന്ന ടെസ്റ്റിന്റെ ആദ്യ ദിനം രാത്രി ഉത്കണ്ഠ കാരണം ഉറങ്ങാനായില്ലെന്ന് ശ്രേയസ് പറഞ്ഞു. രണ്ടാം ദിവസത്തെ കളി അവസാിനിച്ച ശേഷം സംസാരിക്കുമ്പോഴാണ് ശ്രേയസ് ഇക്കാര്യം വെളിപ്പെടുത്തിയത്.
‘ആദ്യ ദിനം മുതല് എല്ലാം നല്ല രീതിയില് നടന്നതില് അതിയായ സന്തോഷം. കഴിഞ്ഞ രാത്രി ശരിക്ക് ഉറങ്ങാന് പോലും പറ്റിയില്ല. പിറ്റേ ദിവസവും ബാറ്റു ചെയ്യേണ്ടി വരുമ്പോള് അത് സംഭവിക്കും. ഇന്നലെ ഞാന് മികച്ച രീതിയില്ത്തന്നെ ബാറ്റു ചെയ്തു. ഇന്നും അതേ ശ്രദ്ധയോടെ കളിക്കേണ്ടിവന്നു.’
‘കഴിഞ്ഞ രാത്രി എനിക്ക് ശരിക്കും ഉറക്കം നഷ്ടപ്പെട്ടു. ഇന്ന് പുലര്ച്ചെ അഞ്ച് മണിക്കു തന്നെ എഴുന്നേല്ക്കുകയും ചെയ്തു. പക്ഷേ, സെഞ്ച്വറി നേടാനായതോടെ സന്തോഷമായി’ ശ്രേയസ് പറഞ്ഞു.
കാണ്പുരില് നടക്കുന്ന ഒന്നാം ടെസ്റ്റില് അരങ്ങേറ്റം കുറിച്ച ശ്രേയസ് 105 റണ്സെടുത്ത് ഒന്നാം ഇന്നിംഗ്സില് ഇന്ത്യയുടെ ടോപ്പ് സ്കോററായി. 171 പന്തുകളില് നിന്ന് 13 ഫോറും രണ്ട് സിക്സും സഹിതമാണ് അയ്യര് 105 റണ്സെടുത്തത്. അഞ്ചാം വിക്കറ്റില് രവീന്ദ്ര ജഡേജയ്ക്കൊപ്പം സെഞ്ച്വറി കൂട്ടുകെട്ടും അയ്യര് പടുത്തുയര്ത്തി.