പ്രഗ്നാനന്ദയുടെ വിജയത്തിന് അമ്മ നാഗലക്ഷ്മിയുടെ സംഭാവനയെക്കുറിച്ചുള്ള ഹൃദയസ്പർശിയായ പോസ്റ്റ് പങ്കുവച്ച് അമുൽ. അമുലിന്റെ ശൈലിയിൽ പ്രഗ്നാനന്ദയുടെയും അമ്മയുടെയും ചിത്രത്തിനൊപ്പമാണ് അമുൽ കുറിപ്പ് പങ്കിട്ടത്.
“ആർ. പ്രഗ്നാനന്ദയുടെ അമ്മ ചെസ്സിലെ വിജയത്തിന് നിശബ്ദമായി സംഭാവന ചെയ്യുന്നു!” എന്ന അടികുറിപ്പോടെയാണ് അമുൽ ഇന്ത്യ പോസ്റ്റ് പങ്കുവച്ചത്. പ്രഗ്നാനന്ദയുടെയും അമ്മയുടെയും ചിത്രമാണ് അമുൽ ശൈലിയിൽ വരച്ചിരിക്കുന്നത്.
ചെസ് ബോർഡ് മുന്നിൽ വച്ചിരിക്കുന്ന പ്രഗ്നനന്ദയ്ക്ക് അമ്മ റൊട്ടി കൊടുക്കുന്നതാണ് ചിത്രത്തിലുള്ളത്. മുകളിലായി ‘ഗ്രാൻഡ് മാ സ്റ്റർ ‘ എന്ന വാക്കുകളും ചിത്രത്തിന് മുകളിൽ കാണാം. മണിക്കൂറുകൾക്ക് മുൻപ് ഷെയർ ചെയ്ത പോസ്റ്റിനു താഴെ നിരവധി പേരാണ് കമന്റ് ചെയ്തിരിക്കുന്നത്.
ചെസ് ലോകകപ്പിൽ ഫൈനൽ പോരാട്ടത്തിൽ നോർവേയുടെ മാഗ്നസ് കാൾസണോടാണ് ആർ. പ്രഗ്നാനന്ദ പൊരുതി തോറ്റത്. ഫൈനലിൽ പരാജയപ്പെട്ടെങ്കിലും മികച്ച മത്സരമാണ് ഇന്ത്യൻ താരം ലോക ചാമ്പ്യന് നൽകിയത്. ഒന്നര പോയൻറ് നേടിയാണ് കാൾസൺ കരിയറിലെ ആദ്യ ലോകകപ്പ് വിജയം സ്വന്തമാക്കിയിരിക്കുന്നത്.