രാജസ്ഥാന് റോയല്സിന്റെ മധ്യനിര ബാറ്റ്സ്മാന് ലിയാം ലിവിങ്സ്റ്റനെ പുറത്താക്കാന് പഞ്ചാബിന്റെ കരീബിയന് താരം ഫാബിയന് അലന് എടുത്ത ക്യാച്ച് ഫീല്ഡിലെ ഉന്നത നിലവാരത്തിന്റെ പുത്തന് ദൃഷ്ടന്തമായി. ഫീല്ഡിംഗിലെ ചക്രവര്ത്തി സാക്ഷാല് ജോണ്ടി റോഡ്സുപോലും കൈയടിച്ചുപോകുന്ന പ്രകടനമാണ് അലനില് നിന്നുണ്ടായത്.
പഞ്ചാബ് കിങ്സിന്റെ പേസര് അര്ഷദീപ് സിംഗ് എറിഞ്ഞ 12-ാം ഓവറിന്റെ അഞ്ചാം പന്തിലായിരുന്നു അലന്റെ അത്ഭുത ക്യാച്ച്. അര്ഷദീപിന്റെ ഗുഡ് ലെങ്ത് ബോളിനെ ലിവിങ്സ്റ്റണ് ഉശിരന് ഷോട്ടിലൂടെ ഗ്രൗണ്ടിന്റെ മൂലയിലേക്ക് പറത്തി.
ഡീപ് മിഡ് വിക്കറ്റില് നിന്ന് കുതിച്ച അലന് വലതുവശത്തേക്ക് ഡൈവ് ചെയ്ത് പന്ത് കൈപ്പിടിയില് ഒതുക്കി. നന്നായി കളിച്ചുകൊണ്ടിരുന്ന ലിവിങ്സ്റ്റണിന്റെ പുറത്താകല് റോയല്സിന് തിരിച്ചടിയാകുകയും ചെയ്തു.