ഇ-ബുള്ജെറ്റ് സഹോദരന്മാരെ ട്രോളി ശ്രീകാന്ത് വെട്ടിയാര്. മോട്ടോര് വാഹന വകുപ്പ് നടപടിയെടുത്തതിന് പിന്നാലെ ഇ-ബുള്ജെറ്റ് സഹോദരന്മാരായ എബിനും ലിബിനും ചെയ്ത വീഡിയോക്ക് സമാനമായ വീഡിയോയുമായാണ് ശ്രീകാന്ത് വെട്ടിയാര് എത്തിയിരിക്കുന്നത്.
ബാഹുബലിയിലെ പള്വാള് ദേവന് എന്ന കഥാപാത്രമായാണ് ശ്രീകാന്തിന്റെ വരവ്. ”വണ്ടിയുടെ മുന്നില് കറങ്ങുന്ന വാള്വെച്ച് മോഡിഫിക്കേഷന് ചെയ്തതിന് എംവിഡി പൊക്കിയ പള്വാള്ദേവന്” എന്നാണ് ട്രോള് വീഡിയോയ്ക്ക് നല്കിയ ക്യാപ്ഷന്.
”ഹായ് ഗയ്സ്, എംവിഡി ചതിച്ചു ഗയ്സ്. എംവിഡി ഞങ്ങളെ പിടിച്ചു വെച്ചു. വണ്ടിയുടെ മുന്നില് മോഡിഫിക്കേഷന് ചെയ്തതിന്. ആള്ക്കാരുടെ തല കണ്ടിച്ച നിസാര കുറ്റത്തിന് ഞങ്ങളെ എംവിഡി പൊക്കി ഗയ്സ്.. ആ ബാഹുബലിയോട് പറഞ്ഞു നിങ്ങള് മഹിഷ്മതി മണ്ണെണ്ണയൊഴിച്ച് കത്തിക്കൂ ഗയ്സ്” എന്നാണ് വീഡിയോയില് ശ്രീകാന്ത് വെട്ടിയാര് പറയുന്നത്.
ഓഗസ്റ്റ് ആദ്യ വാരത്തിലാണ് ഇ ബുള് ജെറ്റ് സഹോദരന്മാര് അറസ്റ്റിലാകുന്നത്. ടെമ്പോ ട്രാവലറില് നിയമവിരുദ്ധമായി രൂപമാറ്റങ്ങള് വരുത്തിയതിന് വ്ളോഗര്മാരായ ലിബിന്റെയും എബിന്റെയും ‘നെപ്പോളിയന്’ എന്ന വാഹനം മോട്ടോര് വാഹന വകുപ്പ് കസ്റ്റഡിയിലെടുക്കുകയും പിഴയിടുകയും ചെയ്തിരുന്നു.