പോക്സോ കേസില് കുടുങ്ങി നിര്മ്മാതാവ് ഏക്താ കപൂറും അമ്മ ശോഭ കപൂറും. ഒടിടി പ്ലാറ്റ്ഫോം എഎല്ടി ബാലാജിയില് വന്ന അഡള്ട്ട് വെബ് സീരീസ് എപ്പിസോഡില് പ്രായപൂര്ത്തിയാകാത്ത പെണ്കുട്ടികളുടെ അശ്ലീല രംഗം പ്രദര്ശിപ്പിച്ചതിനാണ് കേസ്. ഗാന്ദി ബാത്ത് എന്ന വെബ് സീരീസിന്റെ സീസണ് ആറുമായി ബന്ധപ്പെട്ടാണ് കേസെടുത്തിരിക്കുന്നത്.
മുംബൈയിലെ എംഎച്ച്ബി പൊലീസ് ആണ് കേസെടുത്തിരിക്കുന്നത്.
2021 ഫെബ്രുവരിക്കും 2021 ഏപ്രിലിനും ഇടയില് ആള്ട്ട് ബാലാജിയില് സ്ട്രീം ചെയ്ത ഈ പരമ്പരയില് പ്രായപൂര്ത്തിയാകാത്ത പെണ്കുട്ടികളുടെ അശ്ലീല ദൃശ്യങ്ങള് കാണിച്ചു എന്ന പരാതിയിലാണ് കേസ്. എന്നാല് പരാതിയില് പറയുന്ന വിവാദ എപ്പിസോഡ് നിലവില് ഈ ആപ്പില് നിന്നും നീക്കം ചെയ്തിട്ടുണ്ട്.
നേരത്തെയും ഏക്ത വെബ് സീരിസിനെ തുടര്ന്ന് നിയമക്കുരുക്കില്പ്പെട്ടിരുന്നു. പട്ടാളക്കാരെയും കുടുംബങ്ങളെയും അനാദരിക്കുന്നു എന്ന് പറഞ്ഞ് നല്കിയ പരാതിയില് ഇപ്പോള് എക്ത ജാമ്യത്തിലാണ്. കേസില് കോടതി അറസ്റ്റ് വാറണ്ട് വരെ ഇറക്കിയിരുന്നു.
അതേസമയം, എക്ത നിര്മ്മിച്ച ചിത്രം ലവ്, സെക്സ് ഔര് ധോഖ 2 ഏപ്രില് 19 ന് തിയേറ്ററുകളില് റിലീസ് ചെയ്തിരുന്നു. എല്എസ്ടി 2 എന്ന് പേരിട്ടിരിക്കുന്ന ചിത്രം ദിബാകര് ബാനര്ജിയാണ് സംവിധാനം ചെയ്തിരുന്നത്. എന്നാല് ചിത്രം വലിയ ബോക്സോഫീസ് പരാജയമാകുകയായിരുന്നു.