പൃഥ്വിരാജ്, ആസിഫ് അലി, അപര്ണ ബാലമുരളി എന്നിവരെ കേന്ദ്ര കഥാപാത്രങ്ങളാക്കി ഷാജി കൈലാസ് സംവിധാനം ചെയ്യുന്ന ‘കാപ്പ’ ചിത്രത്തിന്റെ ടീസര് പുറത്ത്. മണിക്കൂറുകള്ക്കുള്ളില് 7 ലക്ഷത്തിലധികം വ്യൂസ് നേടിയ ചിത്രം യൂട്യൂബ് ട്രെന്ഡിംഗ് ലിസ്റ്റില് നാലാമതായി തുടരുകയാണ്.
തിരുവനന്തപുരത്തെ ലോക്കല് ഗുണ്ടകളുടെ പശ്ചാത്തലത്തിലാണ് കാപ്പയുടെ കഥ പറയുന്നത്. കൊട്ടമധു എന്ന ഗുണ്ടയായി പൃഥ്വി എത്തുന്നു. വന് മുതല് മുടക്കില് ഒരുങ്ങുന്ന കാപ്പയില് ജഗദീഷ്, ദിലീഷ് പോത്തന്, അന്ന ബെന്, ഇന്ദ്രന്സ്, നന്ദു തുടങ്ങി അറുപതോളം താരങ്ങള് വേഷമിടുന്നുണ്ട്.
ജിനു വി ഏബ്രഹാം, ഡോള്വിന് കുര്യാക്കോസ്, ദിലീഷ് നായര് എന്നിവരുടെ പങ്കാളിത്തത്തില് ആരംഭിച്ച തിയറ്റര് ഓഫ് ഡ്രീംസ്, ഫെഫ്ക റൈറ്റേഴ്സ് യൂണിയന്റെ സഹകരണത്തില് നിര്മ്മിക്കുന്ന ചിത്രമാണ് കാപ്പ.
ജി.ആര്. ഇന്ദുഗോപന് എഴുതിയ ‘ശംഖുമുഖി’ എന്ന നോവലിനെ ആസ്പദമാക്കിയാണ് സിനിമ. ജോമോന് ടി. ജോണ് ഛായഗ്രഹണം നിര്വഹിക്കുന്നു. ആര്ട്ട് ഡയറക്ടര് ദിലീപ് നാഥ്, എഡിറ്റര് ഷമീര് മുഹമ്മദ്, പ്രൊഡക്ഷന് കണ്ട്രോളര് സഞ്ജു വൈക്കം.