‘റോഷാക്ക്’ മികച്ച പ്രതികരണം നേടുന്നതിനിടെ മമ്മൂട്ടിയുടെ അടുത്ത ചിത്രത്തിന്റെ റിലീസ് തീയതി പുറത്ത്. മമ്മൂട്ടി വീണ്ടും തെലുങ്കിലേക്ക് എത്തുന്ന ‘ഏജന്റ്’ ചിത്രത്തിന്റെ റിലീസ് ഡേറ്റ് ആണ് പുറത്തു വന്നിരിക്കുന്നത്. അടുത്ത വര്ഷം സംക്രാന്തി റിലീസ് ആയി ചിത്രം എത്തുമെന്നാണ് നിര്മ്മാതാക്കളായ എ.കെ എന്റര്ടെയ്ന്മെന്റ്സ് അറിയിച്ചിരിക്കുന്നത്.
അഖില് അക്കിനേനി നായകനാകുന്ന ചിത്രത്തില് നെഗറ്റീവ് ഷെയ്ഡുള്ള റോളിലാണ് മമ്മൂട്ടി എത്തുന്നത്. 2019ല് പുറത്തിറങ്ങിയ ‘യാത്ര’ സിനിമയ്ക്ക് ശേഷം മമ്മൂട്ടി വീണ്ടും തെലുങ്കിലേക്ക് എത്തുന്ന ചിത്രമാണ് ഏജന്റ്. ചിത്രത്തിലെ മമ്മൂട്ടിയുടെ ക്യാരക്ടര് പോസ്റ്റര് ഏറെ ശ്രദ്ധ നേടിയിരുന്നു.
തോക്കുമായി നില്ക്കുന്ന മമ്മൂട്ടിയാണ് പോസ്റ്റില് ഉണ്ടായിരുന്നത്. ‘പിശാച്, ദയയില്ലാത്ത രക്ഷകന്’ എന്ന ടാഗ് ലൈനും പോസ്റ്ററില് ഉണ്ടായിരുന്നു. അതിനാല് തന്നെ ചിത്രത്തില് വില്ലന് കഥാപാത്രമായാണ് മമ്മൂട്ടിയെത്തുക എന്നാണ് റിപ്പോര്ട്ടുകള്.
സുരേന്ദര് റെഡ്ഢിയാണ് ഏജന്റ് സംവിധാനം ചെയ്യുന്നത്. ഹിപ്ഹോപ്പ് തമിഴയാണ് ചിത്രത്തിന് സംഗീതം നല്കുന്നത്. പുതുമുഖം സാക്ഷി വൈദ്യയാണ് നായിക. എ.കെ എന്റര്ടെയ്ന്മെന്റ്സ് ആണ് നിര്മാണം.