ഭ്രമം ചിത്രത്തിലെ പ്രകടനത്തെ അഭിനന്ദിച്ച് എത്തിയവരോട് നന്ദി പറഞ്ഞ് നടന് ഉണ്ണി മുകുന്ദന്. ഇന്സ്റ്റഗ്രാം പോസ്റ്റിലൂടെയാണ് ഉണ്ണി മുകുന്ദന് നന്ദി അറിയിച്ചെത്തിയിരിക്കുന്നത്. ചിത്രത്തിന് അഭിനന്ദനമറിയിച്ച് നിരവധി ആളുകള് എത്തുന്നുണ്ടെന്നും ഇക്കാര്യത്തില് തനിക്ക് അതിയായ സന്തോഷമുണ്ടെന്നും താരം പറയുന്നു.
”ഭ്രമത്തിലെ എന്റെ പ്രകടനത്തെ കുറിച്ച് ധാരാളം നല്ല അഭിപ്രായങ്ങളാണ് ലഭിക്കുന്നത്. എല്ലാവര്ക്കും ഒരുപാട് നന്ദി. ഒരു നടനെന്ന നിലയില് ഒരു വിഭാഗത്തിലും ടൈപ്പ്കാസ്റ്റ് ചെയ്യപ്പെടാതിരിക്കാന് ഞാന് എപ്പോഴും ശ്രമിച്ചിട്ടുണ്ട്. ഈ ചിത്രത്തിലും അതിന് സാധിച്ചിട്ടുണ്ടെന്ന് കരുതുന്നു. എന്റെ സംവിധായകന് രവി കെ. ചന്ദ്രനും എന്റെ ബ്രോ പൃഥ്വിരാജിനോടുമാണ് ഇക്കാര്യത്തില് എനിക്ക് നന്ദി പറയേണ്ടത്.”
”ചിത്രത്തിന്റെ തിരക്കഥാകൃത്തായ ശരത്തിനോടും അകമഴിഞ്ഞ് നന്ദിയുണ്ട്. നിങ്ങളോടൊപ്പം ചേര്ന്ന് പ്രവര്ത്തിക്കാന് ഒരിക്കല്ക്കൂടി കാത്തിരിക്കുകയാണ്. നിങ്ങളുടെ സ്നേഹത്തിനും വിശ്വാസത്തിനും ഒരിക്കല് കൂടി നന്ദി. പുതിയ കഥകളുമായി നിങ്ങളെ എല്ലാവരെയും സന്തോഷിപ്പിക്കാന് എനിക്ക് ആഗ്രഹമുണ്ട്. മേപ്പടിയാനുമായി നിങ്ങള്ക്കു മുന്നിലെത്താന് ഞാന് കാത്തിരിക്കുകയാണ്” എന്നാണ് ഉണ്ണി മുകുന്ദന് കുറിച്ചത്.
സിനിമയിലെ കഥാപാത്രത്തെ അനുസ്മരിപ്പിച്ച് ”സന്തോഷകരമായ ദാമ്പത്യ ജീവതത്തിന് ഭാര്യയുമൊത്തുള്ള ചില സെല്ഫീസ് ഉത്തമമാണ്-എന്ന് പാവം ദിനേശ് എന്ന് പറഞ്ഞ് അനന്യയെ ടാഗ് ചെയ്താണ് ഉണ്ണി മുകുന്ദന് പോസ്റ്റ് അവസാനിപ്പിക്കുന്നത്. രസകരമായ കമന്റുകളും പോസ്റ്റിന് ലഭിക്കുന്നുണ്ട്.
ഒക്ടോബര് 7ന് ആണ് ഭ്രമം ആമസോണ് പ്രൈമില് റിലീസ് ചെയ്തത്. രവി കെ. ചന്ദ്രന് സംവിധാനം ചെയ്ത ചിത്രത്തില് പൃഥ്വിരാജ്, മംമ്ത മോഹന്ദാസ്, റാഷി ഖന്ന, അനന്യ, ജഗദീഷ്, ശങ്കര് എന്നിവരാണ് പ്രധാന വേഷങ്ങളില് എത്തിയത്. ബോളിവുഡ് ചിത്രം അന്ധാദുനിന്റെ റീമേക്ക് ആണ് ഭ്രമം.