വില്ലന്‍ വേഷങ്ങളിലൂടെ ശ്രദ്ധ നേടിയ താരമാണ് സ്ഫടികം ജോര്‍ജ്. വില്ലനായ പൊലീസുകാരാനായി നിരവധി ചിത്രങ്ങളില്‍ താരം വേഷമിട്ടിട്ടുണ്ട്. സ്ഫടികം സിനിമയിലെ കുറ്റിക്കാടന്‍ അടക്കമുള്ള പൊലീസ് വേഷങ്ങള്‍ പ്രേക്ഷകശ്രദ്ധ നേടിയവയാണ്. താന്‍ ശരിക്കും പൊലീസ് ആണെന്നാണ് ചിലരുടെയൊക്കെ വിചാരം എന്നാണ് നടന്‍ പറയുന്നത്.
താന്‍ ശരിക്കും പൊലീസാണ് എന്നാണ് പലരുടെയും വിചാരം. ഷൂട്ടിംഗ് സ്ഥലത്ത് ചെല്ലുമ്പോഴും അല്ലാത്ത വേദികളിലുമൊക്കെ പലരും തന്നോട് ഇക്കാര്യം ചോദിച്ചിട്ടുണ്ട്. തന്റെ രൂപം കാണുമ്പോള്‍ ഒരു പൊലീസ് ലുക്കൊക്കെ ഉണ്ടെന്നത് സത്യമാണ്. പൊലീസ് കഥാപാത്രമാകുമ്പോള്‍ അത് നന്നായി ചെയ്യുന്നതിന് ഈ രൂപം സഹായിച്ചിട്ടുണ്ട്.
അതിനപ്പുറം പൊലീസുമായി തനിക്ക് യാതൊരു ബന്ധവുമില്ല. പക്ഷേ, പല പൊലീസുകാരും തന്നെ അവരില്‍ ഒരാളായിട്ടാണ് കാണുന്നത്. ഒരിക്കല്‍ ഒരു സുഹൃത്തിന്റെ ആവശ്യത്തിനായി പൊലീസ് സ്റ്റേഷനില്‍ ചെന്നപ്പോള്‍ അവിടെ ഉണ്ടായിരുന്നവര്‍ ഒരു പൊലീസ് ഉദ്യോഗസ്ഥനോട് പെരുമാറുന്നതു പോലെയാണ് തന്നോട് പെരുമാറിയത്.
റോഡിലൂടെ പോകുമ്പോള്‍ ചില ട്രാഫിക് പൊലീസുകാരും തനിക്ക് സല്യൂട്ട് തന്നിട്ടുണ്ട്, താനൊരു പൊലീസുകാരനാണെന്ന് കരുതിയിട്ടാകാം. എന്തായാലും ദൈവം തന്ന രൂപം കൊണ്ട് പൊലീസുമായി തനിക്ക് നല്ല ബന്ധമുണ്ടാക്കാന്‍ കഴിഞ്ഞിട്ടുണ്ട് എന്നാണ് സ്ഫടികം ജോര്‍ജ് സ്റ്റാര്‍ ആന്‍ഡ് സ്‌റ്റൈലിന് നല്‍കിയ അഭിമുഖത്തില്‍ പറയുന്നത്.
