യുഎസിലെ ലാസ് വെഗസില് മുണ്ടുടുത്ത് എത്തിയ നടന് ഗോവിന്ദ് പത്മസൂര്യയുടെ ചിത്രം സോഷ്യല് മീഡിയയില് വൈറലായിരുന്നു. ‘നാട്ടിലെവിടെയാ’ എന്നെഴുതിയ ടീഷര്ട്ടും മുണ്ടുമുടുത്തായിരുന്നു ജിപി ലാസ് വെഗാസിന്റെ നഗരവീഥിയിലൂടെ നടന്നത്. അന്ന് അങ്ങനെ വേഷം ധരിച്ചതിനെ കുറിച്ച് പറയുകയാണ് താരം ഇപ്പോള്.
താന് അവിടെ ഒരു പാന്റും ഇട്ട് പോയാല് ഈയൊരു ചോദ്യം വരുമായിരുന്നോ? എന്ന് താരം ചോദിക്കുന്നു. അത് ഒരു സംസാര വിഷയമാക്കാന് വേണ്ടി തന്നെയായിരുന്നു അങ്ങനെ ചെയ്തത് എന്നാണ് നടന് ബിഹൈന്ഡ്വുഡ്സിന് നല്കിയ അഭിമുഖത്തില് പറയുന്നത്. തന്റെ ഉള്ളിലെ ഷോ മാന് പുറത്തുവന്നതാണ്.
ലാസ് വെഗസ് വരെ പോയിട്ട് അവിടെ എന്തെങ്കിലും ക്രിയേറ്റീവായ ഒരു വ്യത്യസ്തത കൊണ്ടു വരണമെന്ന് വിചാരിച്ചിരുന്നു. മുണ്ട് മാത്രമല്ല നാട്ടില് എവിടെയാ എന്നെഴുതിയ ഒരു ടീഷര്ട്ടും ഇട്ടാണ് അവിടെ നിന്നത്. മലയാളികള് ഉണ്ടെങ്കില് മാത്രമേ തന്നെ അവിടെ ആരെങ്കിലുമൊക്കെ സാധാരണ നിലയില് തിരിച്ചറിയാറുള്ളൂ.
പക്ഷേ ഈ മുണ്ടിട്ട് നടക്കുമ്പോള് അങ്ങനെയുള്ള വസ്ത്രം അവിടെ ആരും ധരിക്കാത്തതുകൊണ്ട് പുറത്തുനിന്നുള്ള വിദേശികളൊക്കെ ഇങ്ങനെ നോക്കുന്നുണ്ടായിരുന്നു. പിന്നെ നമുക്ക് ഇങ്ങനെ അറ്റന്ഷന് കിട്ടുന്നതും ഇഷ്ടമുള്ള കാര്യമാണല്ലോ എന്ന് ജിപി പറയുന്നു.