കോവിഡ് ഭീതി ഒഴിഞ്ഞ് തിയേറ്ററുകള് തുറക്കുമ്പോള് ആദ്യമായി റിലീസ് ചെയ്യുന്ന മലയാളം സിനിമയാണ് ‘സ്റ്റാര്’. സൈക്കോളജിക്കല് മിസ്റ്ററി ത്രില്ലറായാണ് ചിത്രം എത്തുന്നത്. ഡോമിന് ഡി. സില്വ സംവിധാനം ചെയ്യുന്ന ചിത്രത്തില് ജോജു ജോര്ജ്, പൃഥ്വിരാജ്, ഷീലു എബ്രഹാം എന്നിവരാണ് പ്രധാന കഥാപാത്രങ്ങളാകുന്നത്.
ജോജുവും ഷീലുവുമാണ് ദമ്പതികളായ അഭിനയിക്കുന്നത്. അവരുടെ ജീവിതത്തില് ഉണ്ടാകുന്ന ചില സംഭവങ്ങളാണ് ചിത്രം പറയുന്നത്. സ്റ്റാറില് എക്സ്റ്റന്റഡ് കാമിയോ റോളിലാണ് പൃഥ്വിരാജ് അഭിനയിക്കുന്നത്. ഈ കഥാപാത്രത്തിന് ഏറ്റവും അനുയോജ്യമായത് പൃഥ്വിരാജ് ആണെന്ന് ആദ്യമേ തോന്നിയിരുന്നു എന്നാണ് സംവിധായകന് ഡോമിന് ഡി. സില്വ പറയുന്നത്.
പൃഥ്വിരാജ് ചെയ്ത കഥാപാത്രം സിനിമയ്ക്ക് ഗുണം ചെയ്യും, ഏറ്റവും മികച്ച ഒരാള് തന്നെയാണ് ആ കഥാപാത്രം ചെയ്തത്. ഈ സിനിമയുടെ ശക്തി എന്ന് പറയുന്നത് അതിന്റെ കഥ തന്നെയാണ് എന്നാണ് മനോരമ ഓണ്ലൈന് നല്കിയ അഭിമുഖത്തില് സംവിധായകന് പറയുന്നത്. സ്റ്റാര് എന്ന ചിത്രത്തിന്റെ പേരിനെ കുറിച്ചും ഡോമിന് വ്യക്തമാക്കി.
ജന്മനക്ഷത്രങ്ങളെ ആസ്പദമാക്കി ചെയ്തിട്ടുള്ള സിനിമ ആയതുകൊണ്ടാണ് സ്റ്റാര് എന്ന പേരിട്ടത്. ഓരോ നക്ഷത്രത്തിലും ജനിച്ചുവളര്ന്ന ആളുകള്ക്ക് ഓരോ പ്രത്യേകത ഉണ്ടാകുമെന്നും അവര് ഓരോ വിഷമങ്ങളെ അഭിമുഖീകരിക്കും എന്നും ഒക്കെ പറയാറുണ്ടല്ലോ അങ്ങനെയുള്ള ചില കാര്യങ്ങള് ആണ് സിനിമ പറയുന്നത് എന്നും സംവിധായകന് വ്യക്തമാക്കി.
നാളെയാണ് ചിത്രം തിയേറ്ററുകളില് റിലീസ് ചെയ്യുന്നത്. അബാം മൂവീസിന്റെ ബാനറില് എബ്രഹാം മാത്യു ആണ് ചിത്രം നിര്മ്മിച്ചിരിക്കുന്നത്. പൈപ്പിന് ചുവട്ടിലെ പ്രണയത്തിന് ശേഷം ഡോമിന് ഡി സില്വ സംവിധാനം ചെയ്യുന്ന സ്റ്റാറിന്റെ തിരക്കഥ സുവിന് എസ് സോമശേഖരനാണ്.