മിനിസ്‌ക്രീന്‍ പ്രേക്ഷകരുടെ പ്രിയ താരമാണ് ആതിര മാധവ്. സിനിമ-സീരിയല്‍ ജീവിതത്തെ കുറിച്ചുള്ള വിശേഷങ്ങള്‍ പങ്കുവച്ച ആതിര, ടൊവിനോയുടെ മേക്കപ്പ് ആര്‍ട്ടിസ്റ്റായി എത്തിയതിനെ കുറിച്ചാണ് ഇപ്പോള്‍ തുറന്നു പറഞ്ഞിരിക്കുന്നത്. പൃഥ്വിരാജ് ചിത്രം ലൂസിഫറില്‍ ഒരു ചെറിയ കഥാപാത്രത്തെ അവതരിപ്പിച്ചതിനെ കുറിച്ചാണ് ആതിര പറയുന്നത്.
നിങ്ങള്‍ ക്യാമറ നിരീക്ഷണത്തിലാണ് എന്ന ഭഗത് മാനുവല്‍ സിനിമയുടെ പ്രൊഡക്ഷന്‍ കണ്‍ട്രോളര്‍ വഴിയാണ് താന്‍ പൃഥ്വിരാജിനെ കാണാന്‍ പോയത്. ഷൂട്ടിംഗ് സെറ്റില്‍ എത്തിയപ്പോള്‍ എന്താണ് കഥാപാത്രമെന്ന് അറിയില്ലായിരുന്നു. ശംഖുമുഖം ഉദയാപാലസില്‍ ചെന്നാണ് പൃഥ്വിരാജിനെ കണ്ടത്. അദ്ദേഹം തന്നെ കണ്ടതും ഒരാളെ വിളിപ്പിച്ച് കഥാപാത്രത്തിന് ചേര്‍ന്ന് വസ്ത്രം നല്‍കാന്‍ പറഞ്ഞു.
അപ്പോഴും എന്താണ് കഥാപാത്രമെന്ന് തനിക്ക് ഐഡിയ ഇല്ലായിരുന്നു. ചിത്രത്തില്‍ ടൊവിനോ അവതരിപ്പിക്കുന്ന കഥാപാത്രത്തിന്റെ മേക്കപ്പ് ആര്‍ട്ടിസ്റ്റിന്റെ വേഷമായിരുന്നു അത്. വലിയ റോളൊന്നുമായിരുന്നില്ല. അറിയാവുന്നവര്‍ക്ക് സൂക്ഷിച്ച് നോക്കിയാല്‍ മാത്രമേ ലൂസിഫറില്‍ തന്നെ കണ്ടുപിടിക്കാന്‍ സാധിക്കൂ.
ചെറിയ വേഷമായിരുന്നുവെങ്കിലും ലൂസിഫറിന്റെ ഭാഗമായപ്പോള്‍ ഒരുപാട് പേരെ പരിചയപ്പെടാനും പല കാര്യങ്ങള്‍ പഠിക്കാനും സാധിച്ചു. ചെറിയ വേഷമാണങ്കിലും താന്‍ എന്നും ലൂസിഫറിലെ കഥാപാത്രത്തെ കുറിച്ച അഭിമാനത്തോടെ മാത്രമെ പറയാറുള്ളൂ എന്നാണ് ആതിര മാധവ് അമൃത ടിവിയിലെ പാടാം നേടം പരിപാടിയില്‍ പറയുന്നത്.