വിസ്മയയ്ക്ക് രാഷ്ട്രീയമറിയില്ല, പ്രതികരിച്ചത് വൈകാരികമായി; ഡൽഹിയിലേത് ‘കോക്രോച്ച് പാർട്ടി’യുടെ സമരം, പിന്നിൽ വിദേശ ഫണ്ടിംഗ്: മേജർ രവി

ഡൽഹിയിൽ നടക്കുന്ന നീറ്റ് (NEET) വിദ്യാർത്ഥി സമരത്തെ അനുകൂലിച്ച് പോസ്റ്റിട്ട മോഹൻലാലിന്റെ മകൾ വിസ്മയ മോഹൻലാലിനെ പിന്തുണച്ചും, സമരത്തെ രൂക്ഷമായി വിമർശിച്ചും സംവിധായകൻ മേജർ രവി. വിസ്മയയ്ക്ക് രാഷ്ട്രീയമറിയില്ലെന്നും തികച്ചും വൈകാരികമായാണ് ആ കുട്ടി പ്രതികരിച്ചതെന്നും അദ്ദേഹം പറഞ്ഞു. അതേസമയം ഡൽഹിയിൽ നടക്കുന്നത് യഥാർത്ഥ വിദ്യാർത്ഥി സമരമല്ലെന്നും, ‘കോക്രോച്ച് ജനതാ പാർട്ടി’യുടെ (CJP) നേതൃത്വത്തിൽ വിദേശ ഫണ്ടിങ്ങോടെ നടക്കുന്ന രാഷ്ട്രീയ ഗൂഢാലോചനയാണെന്നും അദ്ദേഹം ആരോപിച്ചു.

​വിസ്മയയുടേത് വൈകാരിക പ്രതികരണം മാത്രം

​വിസ്മയ പഠിച്ചതും വളർന്നതുമെല്ലാം വിയറ്റ്നാമിലാണെന്നും അവൾക്ക് ഇവിടുത്തെ രാഷ്ട്രീയമൊന്നും അറിയില്ലെന്നും മേജർ രവി വ്യക്തമാക്കി. “അങ്ങേയറ്റം മനുഷ്യത്വമുള്ള കുട്ടിയാണവൾ. ഒരു തെരുവുനായയെ കണ്ടാല്‍പ്പോലും അതിനെ എടുത്തുകൊണ്ട് വന്ന് രക്ഷിക്കണം എന്ന് പറഞ്ഞ് കരയുന്ന പ്രകൃതമാണ്. ചെറിയ കുട്ടികളെ തല്ലുന്നത് കണ്ടപ്പോൾ ഉണ്ടായ വിഷമത്തിലാണ് അവൾ ആ പോസ്റ്റിട്ടത്. അല്ലാതെ അതിനെ കോക്രോച്ച് പാർട്ടിക്കുള്ള പിന്തുണയായി വ്യാഖ്യാനിക്കേണ്ട. സമരത്തിന് പിന്നിലെ യാഥാർഥ്യം ഞാൻ അവളെ വിളിച്ച് പറഞ്ഞ് മനസ്സിലാക്കിയിട്ടുണ്ട്,” അദ്ദേഹം പറഞ്ഞു.

​പിന്നിൽ അമേരിക്കൻ ഫണ്ടിംഗും ജോർജ് സോറോസും

​ഡൽഹിയിലെ സമരത്തിന് പിന്നിൽ വലിയ ഗൂഢാലോചനയുണ്ടെന്നാണ് മുൻ സൈനിക ഉദ്യോഗസ്ഥൻ കൂടിയായ മേജർ രവിയുടെ പ്രധാന ആരോപണം. അമേരിക്കൻ ശതകോടീശ്വരനായ ജോർജ് സോറോസിനെപ്പോലുള്ളവരിൽ നിന്നുള്ള ഫണ്ടിംഗ് ഈ സമരത്തിന് ലഭിക്കുന്നുണ്ട്. ശ്രീലങ്ക, ബംഗ്ലാദേശ്, നേപ്പാൾ തുടങ്ങിയ രാജ്യങ്ങളെ അസ്ഥിരപ്പെടുത്തിയതുപോലെ ഇന്ത്യയിലും അസ്ഥിരത സൃഷ്ടിക്കുകയാണ് ഇവരുടെ ലക്ഷ്യം. പ്രധാനമന്ത്രി നരേന്ദ്ര മോദിയെ ലക്ഷ്യം വെച്ചുള്ള ഈ സമരത്തിലുള്ള പലർക്കും നീറ്റിന്റെയോ (NEET) സിബിഎസ്ഇയുടെയോ (CBSE) പൂർണ്ണരൂപം പോലും അറിയില്ലെന്നും അദ്ദേഹം പരിഹസിച്ചു.

​കുട്ടികളല്ല, കുട്ടന്മാരാണ്; അടിച്ചാൽ തിരിച്ചു കിട്ടും

​സമരത്തിലുള്ളത് യഥാർത്ഥ വിദ്യാർത്ഥികളല്ലെന്ന് മേജർ രവി ആരോപിക്കുന്നു. “തുടക്കത്തിൽ കുട്ടികൾക്ക് അടികൊള്ളുന്നത് കണ്ടപ്പോൾ എനിക്കും വിഷമം തോന്നിയിരുന്നു. എന്നാൽ പിന്നീട് ശ്രദ്ധിച്ചപ്പോഴാണ് മനസ്സിലായത് അവിടെയുള്ളത് കുട്ടികളല്ല, മറിച്ച് മറ്റു പല താല്പര്യങ്ങളുമുള്ള കുട്ടന്മാരാണെന്ന്. ഉമർ ഖാലിദിനെയും ഷെർജീൽ ഇമാമിനെയും മോചിപ്പിക്കുക, ആർട്ടിക്കിൾ 370 പുനഃസ്ഥാപിക്കുക തുടങ്ങിയ മുദ്രാവാക്യങ്ങളാണ് നീറ്റ് സമരത്തിന്റെ പേരിൽ അവിടെ ഉയരുന്നത്.”

​പോലീസ് നടപടിയെയും അദ്ദേഹം ന്യായീകരിച്ചു. സമാധാനപരമായി സമരം ചെയ്യാതെ, അതീവ സുരക്ഷാ മേഖലയായ പ്രധാനമന്ത്രിയുടെ വസതിക്ക് മുന്നിലേക്ക് മാർച്ച് നടത്തുകയും, പോലീസിന് നേരെ പെപ്പർ സ്പ്രേ പ്രയോഗിക്കുകയും വാഹനങ്ങൾ തകർക്കുകയും ചെയ്താൽ സ്വാഭാവികമായും നടപടിയുണ്ടാകും. അടിച്ചാൽ തിരിച്ചു കിട്ടും, അതിന് നിന്ന് മോങ്ങിയിട്ട് കാര്യമില്ലെന്നും അദ്ദേഹം തുറന്നടിച്ചു.

​സിനിമാ മേഖലയിൽ നിന്ന് ഡൽഹി സമരത്തിന് പിന്തുണ പ്രഖ്യാപിച്ച് പോകുന്നവർക്കെതിരെയും അദ്ദേഹം ആഞ്ഞടിച്ചു. പണം കിട്ടാതെ പലരും അവിടെ പോകില്ലെന്നും, ചിലർ ടിവിയിൽ മുഖം കാണിക്കാനും ‘ഷോ-ഓഫ്’ നടത്താനും വേണ്ടിയുമാണ് സമരത്തെ പിന്തുണയ്ക്കുന്നതെന്നുമാണ് താരങ്ങളുടെ പേരെടുത്തു പറയാതെയുള്ള മേജർ രവിയുടെ വിമർശനം.