‘കേരളവും അമേരിക്കയും തമ്മിലുള്ള സഹകരണം ശക്തിപ്പെടുത്തും’; ഇന്ത്യയിലെ അമേരിക്കൻ ഐക്യനാടുകളുടെ അംബാസഡർ സെർജിയോ ഗോറുമായി കൂടിക്കാഴ്ച നടത്തി മുഖ്യമന്ത്രി

ഇന്ത്യയിലെ അമേരിക്കൻ ഐക്യനാടുകളുടെ അംബാസഡർ സെർജിയോ ഗോറുമായി കൊച്ചിയിൽ കൂടിക്കാഴ്ച നടത്തി മുഖ്യമന്ത്രി വി ഡി സതീശൻ. ഉന്നത വിദ്യാഭ്യാസം, ടൂറിസം, സംസ്കാരം, നിക്ഷേപം, സമുദ്രമേഖലാ വികസനം തുടങ്ങിയ പരസ്പര താൽപ്പര്യമുള്ള മേഖലകളിൽ കേരളവും അമേരിക്കയും തമ്മിലുള്ള സഹകരണം ശക്തിപ്പെടുത്തുന്നതിലാണ് ചർച്ചകൾ ശ്രദ്ധ കേന്ദ്രീകരിച്ചത്. കൂടിക്കാഴ്ചയിൽ കേരള സർക്കാരിന്റെ ചീഫ് സെക്രട്ടറിയും മറ്റ് ഉന്നത ഉദ്യോഗസ്ഥരും പങ്കെടുത്തു.

കേരളത്തിലെയും അമേരിക്കയിലെയും സർവകലാശാലകളും ഗവേഷണ സ്ഥാപനങ്ങളും തമ്മിൽ സംയുക്ത ഗവേഷണം, അക്കാദമിക് കൈമാറ്റം, നൂതന ആശയങ്ങളിലുള്ള സഹകരണം എന്നിവയുൾപ്പെടെയുള്ള കൂടുതൽ അടുത്ത പങ്കാളിത്തത്തിനുള്ള സാധ്യതകൾ മുഖ്യമന്ത്രി എടുത്തു പറഞ്ഞു. സാംസ്കാരികവും ജനങ്ങൾ തമ്മിലുള്ളതുമായ ബന്ധം ശക്തിപ്പെടുത്തുന്നതിനുള്ള അവസരങ്ങളും ചർച്ച ചെയ്യപ്പെട്ടു. കേരളത്തിലേക്കുള്ള തന്റെ ആദ്യ സന്ദർശനമാണിതെന്ന് സൂചിപ്പിച്ച അംബാസഡർ, സംസ്ഥാനത്തിന്റെ പ്രകൃതിഭംഗി, സമ്പന്നമായ സാംസ്കാരിക പൈതൃകം, അന്താരാഷ്ട്ര ടൂറിസം കേന്ദ്രമെന്ന നിലയിലുള്ള വലിയ സാധ്യതകൾ എന്നിവയിൽ തനിക്ക് മതിപ്പുതോന്നിയെന്ന് പറഞ്ഞു.

വെൽനസ്, ആയുർവേദ ടൂറിസം മേഖലകളിലെ കേരളത്തിന്റെ കരുത്ത് പ്രയോജനപ്പെടുത്തി അമേരിക്കയിൽ നിന്ന് കൂടുതൽ സന്ദർശകരെ ആകർഷിക്കാനുള്ള സാധ്യതകളും അദ്ദേഹം ചൂണ്ടിക്കാട്ടി. സാംസ്കാരിക, വിദ്യാഭ്യാസ, സാമ്പത്തിക, ജനങ്ങൾ തമ്മിലുള്ള ബന്ധം എന്നിവ കൂടുതൽ ദൃഢമാക്കുന്നതിനായി കേരളത്തിലെയും അമേരിക്കയിലെയും നഗരങ്ങൾ തമ്മിൽ ‘സിസ്റ്റർ സിറ്റീസ്’ (സഹോദര നഗരങ്ങൾ) എന്ന ആശയത്തിലൂന്നിയുള്ള പങ്കാളിത്തം സ്ഥാപിക്കുന്നതിനുള്ള സാധ്യതകൾ പരിശോധിക്കാമെന്നും അദ്ദേഹം നിർദ്ദേശിച്ചു.

തുറമുഖങ്ങൾ, ലോജിസ്റ്റിക്സ്, തുറമുഖ-അധിഷ്ഠിത വികസനം എന്നീ മേഖലകളിൽ അന്താരാഷ്ട്ര നിക്ഷേപത്തിനുള്ള കേന്ദ്രമെന്ന നിലയിൽ കേരളത്തിനുള്ള വർധിച്ചുവരുന്ന സാധ്യതകളെ പറ്റിയും മുഖ്യമന്ത്രി അംബാസഡറോട് പറഞ്ഞു. വിഴിഞ്ഞം അന്താരാഷ്ട്ര തുറമുഖം, കൊച്ചി തുറമുഖം എന്നിവയുമായി ബന്ധപ്പെട്ട അവസരങ്ങളെക്കുറിച്ചും ചർച്ച നടന്നു. ഇതിൽ മാരിടൈം ലോജിസ്റ്റിക്സ്, കപ്പൽ നിർമ്മാണവും അറ്റകുറ്റപ്പണിയും, ഗ്രീൻ ബങ്കറിംഗ്, അനുബന്ധ വ്യവസായങ്ങൾ എന്നിവ ഉൾപ്പെടുന്നു.

അമേരിക്കൻ കമ്പനികളും കേരളവും തമ്മിലുള്ള സഹകരണം വർദ്ധിപ്പിക്കുന്നതിനും, കൂടുതൽ യു.എസ്. ബിസിനസ്സുകളെ സംസ്ഥാനത്തെ നിക്ഷേപ അവസരങ്ങളുമായി ബന്ധിപ്പിക്കുന്നതിനും താൽപ്പര്യമുണ്ടെന്ന് അംബാസഡർ അറിയിച്ചു. ഇത്തരം സഹകരണങ്ങൾ ഫലപ്രദമായ നിക്ഷേപങ്ങളിലേക്കും കേരളവും അമേരിക്കയും തമ്മിലുള്ള ശക്തമായ സാമ്പത്തിക ബന്ധങ്ങളിലേക്കും നയിക്കാനുള്ള സാധ്യത അദ്ദേഹം ചൂണ്ടിക്കാട്ടി.