'അവള്‍ പറഞ്ഞ വാക്കുകള്‍ എന്റെ കണ്ണ് നിറച്ചു'; സിന്ധുവിനെ കുറിച്ച് തായ് സു

ടോക്കിയോ ഒളിമ്പിക്‌സില്‍ ഫൈനലില്‍ തോറ്റ തന്നോട് പി.വി സിന്ധു പറഞ്ഞ വാക്കുകള്‍ കണ്ണ് നിറച്ചെന്ന് ചൈനയുടെ തായ് സു യിംഗ്. വനിതകളുടെ ബാഡ്മിന്റണ്‍ സിംഗിള്‍സ് ഫൈനലില്‍ മികച്ച പ്രകടനം പുറത്തെടുത്തിട്ടും ലോക ഒന്നാം നമ്പര്‍ താരമായ തായ് സു യിംഗിന് സ്വര്‍ണം നേടാനായിരുന്നില്ല.

“മത്സരം കഴിഞ്ഞപ്പോള്‍, എന്റെ പ്രകടനത്തില്‍ ഞാന്‍ സംതൃപ്തയായിരുന്നു. പിന്നീട് സിന്ധു എന്റെയടുത്തേക്ക് ഓടിവന്ന് എന്നെ കെട്ടിപ്പിടിച്ചു. എന്റെ മുഖത്ത് പിടിച്ച് അവള്‍ പറഞ്ഞു: എനിക്കറിയാം നീ അസ്വസ്ഥയാണെന്ന്, നീ നന്നായി കളിച്ചു, പക്ഷെ ഇന്ന് നിന്റെ ദിവസമല്ല. പിന്നീടവള്‍ എന്റെ കൈ പിടിച്ചു, എന്നിട്ടുപറഞ്ഞു, അവള്‍ക്ക് എല്ലാം അറിയാമെന്ന്. ആ സത്യസന്ധമായ വാക്കുകള്‍ എന്റെ കണ്ണ് നിറച്ചു” തായ് സു യിംഗ് ഇന്‍സ്റ്റഗ്രാമില്‍ കുറിച്ചു.

സിന്ധുവിനൊപ്പമുള്ള ചിത്രവും തായ് സു ഇന്‍സ്റ്റഗ്രാമില്‍ പങ്കുവെച്ചിട്ടുണ്ട്. ഫൈനലില്‍ ചൈനയുടെതന്നെ ചെന്‍ യൂ ഫേയോടാണ് തായ് സു തോറ്റത്. സെമിയില്‍ തോറ്റെങ്കിലും സിന്ധു വെങ്കല മെഡല്‍ സ്വന്തമാക്കി.