ഫ്രഞ്ച് ക്ലബ്ബ് പി.എസ്.ജിയുടെ താരങ്ങളായ നെയ്മര്‍, എയ്ഞ്ചല്‍ ഡി മരിയ, ലിയാന്‍ഡ്രൊ പെരഡസ് എന്നിവര്‍ക്ക് കോവിഡ് സ്ഥിരീകരിച്ചു. താരങ്ങളുടെ പേര് വെളിപ്പെടുത്താതെ ക്ലബ്ബ് തന്നെയാണ് മൂന്നു താരങ്ങള്‍ക്ക് കോവിഡ് പോസിറ്റീവായതായി ട്വീറ്റ് ചെയ്തത്. പിന്നാലെ ഫ്രഞ്ച് മാധ്യമങ്ങളാണ് താരങ്ങളുടെ പേരുകള്‍ വെളിപ്പെടുത്തിയത്.
സ്പാനിഷ് ദ്വീപായ ഇബിസയില്‍ അവധിയാഘോഷത്തിന് പോയി തിരിച്ചെത്തിയതിനു പിന്നാലെയാണ് താരങ്ങള്‍ക്ക് കോവിഡ് സ്ഥിരീകരിച്ചത്. ചാംപ്യന്‍സ് ലീഗ് ഫൈനലില്‍ ജര്‍മന്‍ ക്ലബ് ബയണ്‍ മ്യൂണിക്കിനോട് പി.എസ്.ജി തോറ്റതിനു പിന്നാലെയാണ് നെയ്മര്‍ ഉള്‍പ്പെടെയുള്ളവര്‍ ഇബിസ ദ്വീപിലേക്ക് അവധിയാഘോഷത്തിന് പോയത്. താരങ്ങള്‍ക്ക് കോവിഡ് പോസിറ്റീവായതോടെ ടീമിലെ എല്ലാ താരങ്ങളും ക്വാറന്റൈനില്‍ പ്രവേശിക്കും.
കോവിഡ് സ്ഥിരീകരിച്ച താരങ്ങള്‍ക്ക് ഈ മാസം പത്തിന് ആര്‍സി ലെന്‍സിനെതിരെ നടക്കുന്ന ലീഗ് വണ്ണിലെ പിഎസ്ജിയുടെ പ്രഥമ മത്സരവും മാഴ്‌സെയ്ക്കെതിരായ സെപ്റ്റംബര്‍ 13ലെ മത്സരവും സൂപ്പര്‍താരത്തിന് നഷ്ടമാകും. പാരീസിലെ സ്വവസതിയിലാണ് നെയ്മര്‍ 14 ദിവസത്തെ ഐസലേഷനില്‍ കഴിയുന്നത്.
Read more
പി.എസ്.ജി താരങ്ങളുടെ കോവിഡ് ബാധ സൂചനകള്‍ പുറത്തുവന്നതിനാല്‍ കഴിഞ്ഞ മാസം 29ന് നടക്കേണ്ട മത്സരം ഈ മാസം 10ലേക്ക് മാറ്റിവെച്ചിരുന്നു. എന്നാല്‍ രോഗം സ്ഥീരീകരിച്ചതോടെ ഇതും മാറ്റിവെക്കേണ്ട അവസ്ഥയാണുള്ളത്.
