കേരള ബ്ലാസ്റ്റേഴ്സ് വിടാനൊരുങ്ങിയ നായകന്‍ ബെര്‍ത്തലോമിവ് ഓഗ്ബെചെയെ പിടിച്ച് നിര്‍ത്തി കേരള ക്ലബ്. ഒരു വര്‍ഷത്തേയ്ക്കാണ് ഓഗ്ബെചെ ബ്ലാസ്റ്റേഴ്‌സുമായി കരാര്‍ പുതുക്കിയിരിക്കുന്നത്. ഓഗബെചെയുടെ വേതനം കുറയ്ക്കാനുളള തീരുമാനവും ബ്ലാസ്റ്റേഴ്സ് പിന്‍വലിച്ചു.
ഇതോടെയാണ് ക്ലബില്‍ തുടരാന്‍ ഓഗ്ബെചെ സമ്മതം മൂളിയത്. നേരത്തെ കോവിഡ് 19ന്റെ പശ്ചാത്തലത്തില്‍ ഓഗ്ബെചെയുടേത് അടക്കം വിദേശ താരങ്ങളുടെ വേതനം കുറയ്ക്കാന്‍ ബ്ലാസ്റ്റേഴ്സ് തീരുമാനിച്ചിരുന്നു. ഇതോടെയാണ് ക്ലബ് ഉപേക്ഷിച്ച് മറ്റ് സാധ്യതകള്‍ തേടാന്‍ നൈജീരിയന്‍ സൂപ്പര്‍ താരം തീരുമാനിച്ചത്.
സന്ദേഷ് ജിങ്കന്‍ ബ്ലാസ്റ്റേഴ്സ് വിട്ടതോടെ ബ്ലാസ്റ്റേഴ്സ് ആരാധകക്കൂട്ടം ആശ്വാസം കൊണ്ടത് ടീമിലെ ഓഗ്‌ബെചെയുടെ സാന്നിദ്ധ്യമായിരുന്നു. എന്നാല്‍ കഴിഞ്ഞ ദിവസം പ്രമുഖ സ്പോട്സ് ജേര്‍ണലിസ്റ്റായ മാര്‍ക്കസ് മെര്‍ഗുലാവോയാണ് ഓഗ്ബെചെ ബ്ലാസ്റ്റേഴ്സ് വിടാനുളള നീക്കങ്ങള്‍ നടത്തുന്നുണ്ടെന്ന വിവരം പുറത്ത് വിട്ടത്. ഇതോടെയാണ് ബ്ലാസ്റ്റേഴ്സ് മാനേജുമെന്റ് ഉണര്‍ന്ന് പ്രവര്‍ത്തിച്ചത്.
Read more
ഐഎസ്എല്‍ ആറാം സീസണില്‍ ബ്ലാസ്റ്റേഴ്സ് 29 ഗോളുകള്‍ നേടിയപ്പോള്‍ പകുതിയിലധികം (15) ഗോളുകളും നേടിയത് ഈ നൈജീരിയന്‍ താരമായിരുന്നു. ഇതോടെ ബ്ലാസ്റ്റേഴ്സിന്റെ എക്കാലത്തേയും മികച്ച ഗോള്‍വേട്ടക്കാരനായും ഓഗ്ബെചെ മാറിയിരുന്നു.
