ബെംഗളൂരുവിനെതിരേ ബ്ലാസ്‌റ്റേഴ്‌സ് ആരാധകര്‍ കാത്തിരിക്കുന്നത് ആ ആഘോഷത്തിന്

ഇന്ത്യന്‍ സൂപ്പര്‍ ലീഗിലെ എല്‍ ക്ലാസിക്കോ എന്നാണ് ബെംഗളൂരു എഫ്‌സി-കേരള ബ്ലാസ്റ്റേഴ്‌സ് മത്സരത്തെ ആരാധകര്‍ വിലയിരുത്തുന്നത്. രണ്ട് ടീമുകള്‍ നേര്‍ക്കുനേര്‍ വരുമ്പോള്‍ കളിക്കാരേക്കാള്‍ കൂടുതല്‍ ആവേശം എല്ലാസമയത്തെയും പോലെ ആരാധകര്‍ക്കാണ്. കേരള ബ്ലാസ്‌റ്റേഴ്‌സിന്റെ ആരാധക കൂട്ടായ്മ മഞ്ഞപ്പടയും ബെംഗളൂരുവിന്റെ ആരാധകരായ വെസ്റ്റ് ബ്ലോക്ക് ബ്ലൂസും തമ്മിലുള്ള പോരാട്ടമാകും കൊച്ചിയല്‍ 31ന് നടക്കുന്ന ഐഎസ്എല്‍ മത്സരമെന്നാണ് കണക്കുകൂട്ടലുകള്‍.

കേരള ബ്ലാസ്റ്റേഴ്‌സിന്റെ നിര്‍ണായക താരങ്ങളായ റിനോ ആന്റോയും സികെ വിനീതും ഇന്ത്യന്‍ ഫുട്‌ബോളില്‍ ഇടം കണ്ടെത്തിയത് ബെംഗളൂരു കുപ്പായത്തിലാണ്. ഈ സീസണ്‍ മുതല്‍ ബ്ലാസ്റ്റേഴ്‌സിന്റെ സ്ഥിരം താരങ്ങളായ ഇവര്‍ക്കെതിരേ ബെംഗളൂരു ആരാധകര്‍ അധിക്ഷേപ ചാന്റ് പാടിയത് ഫുട്‌ബോള്‍ ലോകത്തെ ഞെട്ടിപ്പിച്ചിരുന്നു. കൊച്ചിയില്‍ ഇതിന്റെ മുതലും പലിശയും ചേര്‍ത്ത് തരാമെന്ന് അന്ന് ബ്ലാസ്റ്റേഴ്‌സ് ആരാധകര്‍ ഉറപ്പിച്ചിരുന്നു.

എന്നാല്‍, തന്റെ പഴയ ക്ലബ്ബ് ബെംഗളൂരുവിനെതിരേ ഗോള്‍ നേടിയാല്‍ ആഘോഷിക്കില്ലെന്ന് പ്രഖ്യാപിച്ച് വിനീത് രംഗം തണുപ്പിക്കാന്‍ നോക്കിയിരുന്നെങ്കിലും കഴിഞ്ഞ ദിവസം വെസ്റ്റ് ബ്ലോക്ക് ബ്ലൂസ് താരത്തെ ചൊറിഞ്ഞ് ട്വിറ്ററിലൂടെ രംഗത്തെത്തിയിരുന്നു. ഇതിന് കൃത്യമാ മറുപടി താരം നല്‍കിയെങ്കിലും മഞ്ഞപ്പടയാരാധകര്‍ വനീത് ഗോളടിക്കുമെന്നും കിടിലന്‍ ആഘോഷം കാഴ്ചവെക്കുമെന്നുമാണ് പ്രതീക്ഷിക്കുന്നത്.

അതേസമയം, സീസണിന്റെ തുടക്കം മുതലേ തകര്‍പ്പന്‍ പ്രകടനം കാഴ്ച വെക്കുന്ന ബംഗ്ലൂരുവും ആദ്യ ഘട്ടത്തിലെ മെല്ലെപ്പോക്കിനു ശേഷം ഫോമിലേക്കെത്തിക്കൊണ്ടിരിക്കുന്ന ബ്ലാസ്റ്റേഴ്‌സും തമ്മിലുള്ള പോരാട്ടം മികച്ചതാവുമെന്ന കാര്യത്തില്‍ ആരാധകര്‍ക്ക് സംശയമില്ല. ക്രിസ്മസ് ആഗ്രഹമായി ബംഗളുരുവിനെതിരെ ഗോള്‍ നേടണമെന്നു വിനീതും അതിനു അസിസ്റ്റ് നല്‍കണമെന്ന് റിനോ ആന്റോയും പറഞ്ഞത് ബെംഗളൂരുവിനെതിരേ തങ്ങളുടെ സൂപ്പര്‍ താരം ഗോള്‍ ആഘോഷിക്കുമെന്നാണ് ബ്ലാസ്‌റ്റേഴ്‌സ് ആരാധകര്‍ കരുതുന്നത്.