ഇംഗ്ലണ്ടില്‍ നിന്ന് ഇന്ത്യയുടെ നീലപ്പട ലോകകിരീടവുമായി മടങ്ങി വരുമോയെന്ന് കാത്തിരിക്കുന്ന ആരാധകരെ ഞെട്ടിച്ച് ക്രിക്കറ്റ് ലോകത്ത് നിന്നും ഒരു വിരമിക്കല്‍ വാര്‍ത്ത. ഇന്ത്യയുടെ എക്കാലത്തേയും മികച്ച ഓള്‍റൗണ്ടര്‍മാരില്‍ ഒരാളായ യുവരാജ് സിംഗ് രാജ്യന്തര ക്രിക്കറ്റില്‍ നിന്നും വിരമിച്ചു.
ഏറെ നാളായി ടീം ഇന്ത്യയ്ക്ക് പുറത്തായ യുവരാജ് സിംഗ് ഇനി വിവിധ രാജ്യങ്ങളിലെ ടി20 ടൂര്‍ണമെന്റുകളില്‍ പാഡണിയും. 37ാം വയസ്സിലാണ് ഇനി രാജ്യാന്തര ക്രിക്കറ്റിലേക്ക് തിരിച്ചു വരവില്ലെന്ന് യുവരാജ് പ്രഖ്യാപിച്ചിരിക്കുന്നത്.
ഗാംഗുലിയുടെ “വണ്ടര്‍ ടീമില്‍” അംഗമായി 2000- ല്‍ കെനിയക്കെതിരെ ഏകദിന ക്രിക്കറ്റില്‍ അരങ്ങേറിയ യുവരാജ് 304 ഏകദിനങ്ങളില്‍ ഇന്ത്യക്കായി കളിച്ചു. 40 ടെസ്റ്റിലും 58 ടി20 മത്സരങ്ങളിലും ഇന്ത്യന്‍ ജെഴ്‌സി അണിഞ്ഞ യുവരാജ് 2007ലെ ടി20 ലോക കപ്പ് നേട്ടത്തിലും 2011- ലെ ഏകദിന ലോക കപ്പ് നേട്ടത്തിലും നിര്‍ണായക പങ്കു വഹിച്ചു.
2011ലെ ഏകദിന ലോക കപ്പില്‍ 362 റണ്‍സും 15 വിക്കറ്റും സ്വന്തമാക്കിയ യുവിയായിരുന്നു ഇന്ത്യ കിരീടം നേടിയപ്പോള്‍ ടൂര്‍ണമെന്റിന്റെ താരം.
2007ലെ ട്വന്റി-20 ക്രിക്കറ്റ് ലോക കപ്പില്‍ ഒരോവറിലെ ആറ് പന്തും സിക്‌സറിന് പായിച്ച് ക്രിക്കറ്റ് ലോകത്തെ വിസ്മയിപ്പിച്ചു യുവി. 2011ലെ ഏകദിന ലോക കപ്പിന് ശേഷം ക്യാന്‍സര്‍ രോഗത്തിന് ചികിത്സ തേടി രോഗമുക്തനായി കളിക്കളത്തില്‍ തിരിച്ചെത്തി പോരാട്ടവീര്യത്തിന്റെ പ്രതിരൂപമായി.
304 ഏകദിനങ്ങളില്‍ നിന്ന് 14 സെഞ്ച്വറിയും 52 അര്‍ധസെഞ്ച്വറിയും സഹിതം 8701 റണ്‍സടിച്ച യുവി 111 വിക്കറ്റുകളും സ്വന്തമാക്കി. ഏകദിനങ്ങളിലെ മികവ് ടെസ്റ്റിലേക്ക് പകര്‍ത്താന്‍ യുവിക്ക് പക്ഷെ കഴിഞ്ഞില്ല. 40 ടെസ്റ്റുകളില്‍ പാഡണിഞ്ഞ യുവിക്ക് മൂന്ന് സെഞ്ച്വറിയും 11 അര്‍ധസെഞ്ച്വറിയും സഹിതം 1900 റണ്‍സെ നേടാനായുള്ളു. ഒമ്പത് വിക്കറ്റും നേടി. ഏകദിന ക്രിക്കറ്റ് കഴിഞ്ഞാല്‍ ടി20 ക്രിക്കറ്റിലായിരുന്നു യുവരാജിന്റെ രാജവാഴ്ച പിന്നീട് കണ്ടത്.
ഇന്ത്യക്കായി 58 ടി20 മത്സരങ്ങളില്‍ കളിച്ച യുവി 136.38 പ്രഹരശേഷിയില്‍ 1177 റണ്‍സടിച്ചു. എട്ട് അര്‍ധസെഞ്ച്വറിയും ഇതില്‍ ഉള്‍പ്പെടുന്നു. 28 വിക്കറ്റുകളും സ്വന്തമാക്കി. 2017ല്‍ വെസ്റ്റിന്‍ഡീസിനെതിരെ ആണ് യുവി ഏകദിനങ്ങളില്‍ അവസാനമായി ഇന്ത്യന്‍ ജെഴ്‌സി അണിഞ്ഞത്. 2017ല്‍ ഇംഗ്ലണ്ടിനെതിരെ ആയിരുന്നു അവസാന ടി20 മത്സരം.
Read more
രാജ്യാന്തര ക്രിക്കറ്റില്‍ നിന്ന് പാഡഴിക്കുന്ന യുവിയെ കാനഡയിലെ ജി ടി20, യൂറോ ടി20 ടൂര്‍ണമെന്റുകളില്‍ ആരാധകര്‍ക്ക് തുടര്‍ന്നും കാണാനാകും. ഇതിനായി യുവരാജ് ബിസിസിഐയുടെ അനുമതി തേടിയിരുന്നു. ഐപിഎല്ലില്‍ ഈ സീസണില്‍ മുംബൈ ഇന്ത്യന്‍സിനായി പാഡണിഞ്ഞ താരത്തിന് കൂടുതല്‍ അവസരങ്ങള്‍ ലഭിച്ചിരുന്നില്ല.
