രഞ്ജി ട്രോഫി ക്രിക്കറ്റില് ഏറ്റവും കൂടുതല് കിരീടനേട്ടമുള്ള മുംബൈ ടീമിനെ യുവ ഓപ്പണര് പൃഥ്വി ഷാ നയിക്കുമെന്ന് റിപ്പോര്ട്ട്. ജനുവരി 13നാണ് രഞ്ജി ട്രോഫി സീസണ് ആരംഭിക്കുന്നത്. എലൈറ്റ് ഗ്രൂപ്പ് സിയില് കര്ണാടക, ഡല്ഹി, ഹൈദരാബാദ്, മഹാരാഷ്ട്ര, ഉത്തരാഖണ്ഡ് എന്നിവയ്ക്കൊപ്പമാണ് മുംബൈക്ക് സ്ഥാനം.
മികച്ച ക്യാപ്റ്റന്സി റെക്കോഡും ബാറ്റിംഗ് ഫോമുമാണ് മുംബൈ ടീമിന നയിക്കാന് പൃഥ്വി ഷായ്ക്ക് അവസരമൊരുക്കുന്നത്. മാര്ച്ചില് വിജയ് ഹസാരെ ട്രോഫിയില് പൃഥ്വിയുടെ നേതൃത്വത്തില് മുംബൈ ജേതാക്കളായിരുന്നു. എട്ടു മത്സരങ്ങളില് നാല് സെഞ്ച്വറി അടക്കം 827 റണ്സാണ് പൃഥ്വി അടിച്ചുകൂട്ടിയത്.
Read more
എന്നാല് ഈ സീസണിലെ രണ്ട് വൈറ്റ് ബോള് ടൂര്ണമെന്റുകളിലും മുംബൈ നിറം മങ്ങിപ്പോയി. സയ്യിദ് മുഷ്താഖ് അലി ട്രോഫിയിലും വിജയ് ഹസാരെയിലും ലീഗ് ഘട്ടത്തില് തന്നെ മുംബൈ പുറത്തായിരുന്നു. സയ്യിദ് മുഷ്താഖ് അലിയില് അജിന്ക്യ രഹാനെയും വിജയ് ഹസാരെ ട്രോഫിയില് ഷമാസ് മുളാനിയുമാണ് മുംബൈയുടെ ക്യാപ്റ്റന്മാരായത്. രഹാനെയും മറ്റൊരു സീനിയര് താരം സൂര്യകുമാര് യാദവും ഇന്ത്യക്കായി കളിക്കുന്ന സാഹചര്യത്തിലാണ് പൃഥ്വി ഷായ്ക്ക് വഴിയൊരുങ്ങുന്നത്.