ഐപിഎല്‍ 15ാം സീസണ്‍ അവസാനിക്കുന്നതോടെ ക്രിക്കറ്റ് പ്രേമികള്‍ക്ക് മുന്നിലേക്ക് എത്തുന്ന അടുത്ത വസന്തം വരാനിരിക്കുന്ന ടി20 ലോക കപ്പാണ്. ഓസ്‌ട്രേലിയ വേദിയാകുന്ന ടി20 ലോക കപ്പ് ഈ വര്‍ഷം ഒക്ടോബന്‍ നവംബര്‍ മാസങ്ങളിലായിട്ടാണ് നടക്കുക. ഇന്ത്യന്‍ താരങ്ങളെ സംബന്ധിച്ചിടത്തോളം ഐപിഎല്‍ എന്നത് ലോക കപ്പ് സ്ഥാനമുറപ്പിക്കാനുള്ള പോരാട്ടം കൂടിയാണ്.
ഐപിഎല്‍ സീസണ്‍ അവസാന ദിവസങ്ങളിലേക്ക് അടുക്കുമ്പോള്‍ ആരൊക്കെ ടീമിലേക്ക് എത്തുമെന്നതില്‍ ഏകദേശമൊരു ചിത്രം പാതി തെളിഞ്ഞെന്ന് പറയാം. അത്തരത്തില്‍ ഇന്ത്യന്‍ ടീമില്‍ സ്ഥാനമുറപ്പിച്ച 10 താരങ്ങള്‍ ഇവരാണ്. ഇതില്‍ പുതുമുഖങ്ങള്‍ ഒന്നും സ്ഥാനം പിടിച്ചിട്ടില്ലെങ്കിലും സൂപ്പര്‍ ഓള്‍റൗണ്ടറുടെ തിരിച്ചുവരവ് പ്രതീക്ഷയാണ്.
രോഹിത് ശര്‍മ (ക്യാപ്റ്റന്‍), കെഎല്‍ രാഹുല്‍, വിരാട് കോഹ്‌ലി, റിഷഭ് പന്ത്, സൂര്യകുമാര്‍ യാദവ്, രവീന്ദ്ര ജഡേജ, ഹാര്‍ദിക് പാണ്ഡ്യ, ജസ്പ്രീത് ബുംറ, യുസ്വേന്ദ്ര ചാഹല്‍, ഭുവനേശ്വര്‍ കുമാര്‍, മുഹമ്മദ് ഷമി എന്നിവരാണ് ടീമില്‍ സ്ഥാനം കണ്ടെത്തി എന്ന് ഉറപ്പിക്കാവുന്നവര്‍. ഇതില്‍ രാഹുലും പാണ്ഡ്യയും ചാഹലും ഷമിയും ഐപിഎല്ലില്‍ തിളക്കമാര്‍ന്ന പ്രകടനമാണ് കാഴ്ചവയ്ക്കുന്നത്. ബാക്കിയുള്ളവരുടെ വരവ് അനുഭവ സമ്പത്തിന്റെയും സീനിയോരിറ്റിയും പേരിലാണെന്ന് പറയാം.
ഐപിഎല്ലിലെ പ്രകടനം കൊണ്ടുമാത്രം ‘സൂപ്പര്‍’ സീനിയേഴ്‌സിനെ എഴുതി തള്ളുന്ന പാരമ്പര്യം ഇന്ത്യന്‍ ക്രിക്കറ്റിന് ഇല്ല എന്നുള്ളതാണ്, രോഹിത്, ബുംറ, കോഹ്‌ലി, ജഡേജ താരങ്ങളെ സംരക്ഷിക്കുന്നത്. ഇവരെ മാറ്റി നിര്‍ത്തിയുള്ള ഒരു മത്സരം ആരാധകര്‍ക്കും ചിന്തിക്കാന്‍ കഴിയില്ല.
Read more
ശിഖര്‍ ധവാന്‍, ദിനേശ് കാര്‍ത്തിക്, ഇഷാന്‍ കിഷന്‍, സഞ്ജു സാംസണ്‍, പൃഥ്വി ഷാ, ശ്രേയസ് അയ്യര്‍, ദീപക് ചഹാര്‍, ആര്‍ അശ്വിന്‍ തുടങ്ങിയ താരങ്ങളുടെ വരവ് നിലവിലത്തെ സാഹചര്യത്തില്‍ സെലക്ടര്‍മാരെ ആശ്രയിച്ചാണ് ഇരിക്കുന്നത്. ഉമ്രാന്‍ മാലിക്ക് അടക്കമുള്ള പുതുമുഖങ്ങളുടെ കാര്യവും അങ്ങനെ തന്നെ.
