ഐപിഎല്ലിന്റെ അടുത്ത സീസണില്, ഇതിഹാസ താരവും ക്യാപ്റ്റനുമായ എം.എസ്. ധോണിയെ ചെന്നൈ സൂപ്പര് കിംഗ്സ് നിലനിര്ത്തില്ലെന്ന് ഉറപ്പായി. സൂപ്പര് കിംഗ്സ് സഹ ഉടമ എന്.ശ്രീനിവാസന് ഇക്കാര്യം വ്യക്തമാക്കി.
എം.എസ്. വളരെ മാന്യനായ വ്യക്തിയാണ്. ഐപിഎല് ടീമുകള്ക്ക് താരങ്ങളെ നിലനിര്ത്താനുള്ള നയം പുറത്തു വിടുന്നതു വരെ കാത്തിരിക്കാനാണ് ധോണി തീരുമാനിച്ചത്. തന്നെ നിലനിര്ത്തുന്നതിലൂടെ സി.എസ്.കെ. വലിയ തോതില് പണം ചെലവിടുന്നത് കാണാന് ധോണി ഇഷ്ടപ്പെടുന്നില്ല. അതാണ് ഇക്കാര്യത്തില് നേരത്തെ വ്യത്യസ്തമായ മറുപടികള് പറയേണ്ടി വന്നത്- ശ്രീനിവാസന് പറഞ്ഞു.
ഒരു ഐപില് ടീമിന് നാല് താരങ്ങളെ നിലനിര്ത്താനാണ് അനുമതി നല്കിയിരിക്കുന്നത്. നാല് പേരെ നിലനിര്ത്തുകയാണെങ്കില് ആദ്യ കളിക്കാരന് ഒരു ഫ്രാഞ്ചൈസി 16 കോടി ചെലവിടണം. മൂന്നു പേരെ നിലനിര്ത്തുകയാണെങ്കില് 15ഉം ഒന്നോ രണ്ടോ താരങ്ങളെ നിലനിര്ത്തിയാല് 14ഉം കോടിവീതം ചെലവിടണം. സൂപ്പര് കിംഗ്സ് നാല് കളിക്കാരെ ഒപ്പംനിര്ത്തുമെന്നാണ് സൂചന.
Read more
അതേസമയം, ധോണി സൂപ്പര് കിംഗ്സിന്റെ കോച്ചിംഗ് സ്റ്റാഫില് എത്താന് സാദ്ധ്യതയുണ്ടെന്നറിയുന്നു. കളിക്കാനാണ് തീരുമാനമെങ്കില് സൂപ്പര് കിംഗ്സിന് പുറമെ മറ്റ് ടീമുകളും ധോണിയെ റാഞ്ചാന് ശ്രമിക്കും. പ്രത്യേകിച്ച് പുതിയ രണ്ടു ടീമുകള് വരുന്ന സാഹചര്യത്തില്. പുതിയ ടീമുകളിലൊന്നിന്റെ ക്യാപ്റ്റന് സ്ഥാനവും ധോണിക്ക് നല്കാനും ഉടമകള് തയ്യാറായേക്കും.