ഇന്ത്യാ – പാകിസ്താന്‍ ടീമുകള്‍ തമ്മലുളള വൈരം ക്രിക്കറ്റ് ലോകത്തിന് മുഴുവന്‍ അറിവുള്ളതാണ്. എന്നാല്‍ ഇന്ത്യയുടെ മുന്‍ നായകന്‍ എംഎസ് ധോണിയില്‍ നിന്ന് വിലപിടിച്ച സമ്മാനം ലഭിച്ചതിന്റെ ത്രില്ലിലാണ് പാക് പേസ് ബൗളര്‍ ഹാരിസ് റൗഫ്.
ഐപിഎല്ലിലെ സ്വന്തം ടീം ചെന്നൈ സൂപ്പര്‍ കിങ്സിലെ തന്റെ നമ്പര്‍ 7 ജഴ്സിയാണ് ധോണി പാക് താരത്തിന് സമ്മാനമായി നല്‍കിയത്. ഇതിന്റെ ചിത്രങ്ങള്‍ പാക് താരം തന്നെ സാമൂഹ്യമാധ്യമങ്ങളില്‍ ഇട്ടതോടെ ആരാധകരും ഇപ്പോള്‍ കയ്യടിക്കുകയാണ്.
‘ക്യാപ്റ്റന്‍ കൂളും ഇതിഹാസവുമായ ധോണി ഈ മനോഹരമായ സമ്മാനം നല്‍കി എന്നെ ആദരിച്ചു. ഈ ‘ഏഴ്’ ഇപ്പോഴും ഹൃദയങ്ങള്‍ കീഴടക്കുന്നു. പിന്തുണയ്ക്ക് നന്ദി’ – ജഴ്സിയുടെ രണ്ട് ചിത്രങ്ങള്‍ക്കൊപ്പം ഹാരിസ് റൗഫ് ട്വിറ്ററില്‍ കുറിച്ചു.
അടുത്തിടെ ടി20 ലോകകപ്പിലൂടെ ശ്രദ്ധേയനായ താരമാണ് റൗഫ്. പാകിസ്ഥാനെ ലോകകപ്പ് സെമിയിലെത്തിക്കുന്നതില്‍ നിര്‍ണായക പങ്കാണ് വഹിക്കുകയും ചെയ്തിരുന്നു. ഓസീസിലെ ബിഗ് ബാഷ് ലീഗില്‍ മെല്‍ബണ്‍ സ്റ്റാര്‍ താരമാണ് ഹാരിസ് റഊഫ്.
പാകിസ്ഥാന്റെ പരിമിത ഓവര്‍ ടീമിലെ സ്ഥിരസാന്നിധ്യമാകാന്‍ കുറഞ്ഞകാലം കൊണ്ട് റൗഫിന് സാധിച്ചിട്ടുണ്ട്. ധോണി നേരത്തെ തന്നെ ജഴ്‌സി റൗഫിന് വാഗ്ദാനം ചെയ്തിരുന്നു. അത് പാലിക്കുകയാണ് ചെയ്തത്. 2020 ല്‍ അന്താരാഷ്ട്ര ക്രിക്കറ്റില്‍ നിന്ന് വിരമിച്ചെങ്കിലും ഐപിഎല്ലില്‍ വിലയേറിയ താരമാണ് ധോനി ഇപ്പോഴും.
കഴിഞ്ഞ സീസണില്‍ ധോനിക്ക് കീഴില്‍ ടീം കപ്പടിച്ചിരുന്നു. ഇക്കുറി ഐപിഎല്ലില്‍ സിഎസ്‌കെ നിലനിര്‍ത്തിയ കളിക്കാരിലൊരാളാണ് ധോണി. 12 കോടി രൂപയാണ് ധോണിക്ക് വാര്‍ഷിക ശമ്പളമായി ലഭിക്കുക.
Read more
15-ാം ഐപിഎല്‍ അടുത്തിരിക്കെ ടീമിന്റെ ലേലവുമായി ബന്ധപ്പെട്ട തിരക്കുകളിലാണ് ധോണി. വരാനിരിക്കുന്ന സീസണിലും ധോണി തന്നെയായിരിക്കും ടീമിന്റെ ക്യാപ്റ്റന്‍. ധോനിയുടെ വിലപിടിച്ച സമ്മാനം ഇപ്പോള്‍ പാക് ആരാധകരുടേയും ഹൃദയം കവര്‍ന്നിരിക്കുകയാണ്.
