ന്യൂസിലന്‍ഡിനെതിരായ രണ്ടാം ടി20യിലും ഇന്ത്യയ്ക്ക് തകര്‍പ്പന്‍ ജയം നേടിയപ്പോള്‍ കളിയിലെ താരമായി തിരഞ്ഞെടുത്തത് ഇന്ത്യന്‍ ഓപ്പണര്‍ കെഎല്‍ രാഹുല്‍. രോഹിത്ത് ശര്‍മ്മയും കോഹ്ലിയുമെല്ലാം അടങ്ങുന്ന ടീമില്‍ ഇത് രണ്ടാം തവണയാണ് പുതുമുഖ താരങ്ങളുടെ “ഷൈനിംഗ്”.
കിവീവ് ഉയര്‍ത്തിയ 134 റണ്‍സ് വിജയലക്ഷ്യത്തിന് മുന്നില്‍ കോഹ്ലിയും രോഹിത്തും തിളങ്ങാതെ പോയപ്പോള്‍ യുവതാരങ്ങളായ രാഹുലും ശ്രേയസ് അയ്യരും പ്രതീക്ഷ കാത്തു. രാഹുല്‍ 50 പന്തില്‍ മൂന്ന് ഫോറും രണ്ട് സിക്‌സും സഹിതം 57 റണ്‍സെടുത്തപ്പോള്‍ അയ്യര്‍ 33 പന്തില്‍ ഒരു ഫോറും മൂന്ന് സിക്‌സും സഹിതം 44 റണ്‍സും എടുത്തു. ശ്രേയസ് രണ്ടാം ടി20ല്‍ കൂടി തിളങ്ങിയതോടെ ഇന്ത്യയുടെ നാലാം നമ്പര്‍ തലവേദനയ്ക്ക് കൂടിയാണ് ഇതോടെ പരിഹാരമായിരിക്കുന്നത്.
നേരത്തെ ടോസ് നേടി ബാറ്റിംഗെടുത്ത കിവീസിനെ 20 ഓവറില്‍ അഞ്ച് വിക്കറ്റ് നഷ്ടത്തില്‍ 132 റണ്‍സിന് ഇന്ത്യന്‍ ബൗളര്‍മാര്‍ പിടിച്ചുകെട്ടുകയായിരുന്നു. ഇന്ത്യയ്ക്കായി രവീന്ദ്ര ജഡേജ രണ്ട് വിക്കറ്റ് വീഴത്തുകയും ദുബെ ഭുംറ താക്കൂര്‍ എന്നിവര്‍ ഓരോ വിക്കറ്റ് വീതം വീഴ്ത്തുകയും ചെയ്തു.
Read more
കിവീസിനായി ഗുപ്റ്റില്‍ (33), മുണ്‍റോ (26), ടിം സെയ്‌ഫേര്‍ട്ട് (33*) എന്നിവരാണ് തരക്കേടില്ലാത്ത പ്രകടനം കാഴ്ച്ചവെച്ചത്. ഇതോടെ അഞ്ച് മത്സരങ്ങളടങ്ങിയ പരമ്പര ഇന്ത്യ2-0ത്തിന് മുന്നിലെത്തി.
