ന്യൂസിലന്‍ഡിനെതിരെ സമ്പൂര്‍ണ പരമ്പരയ്ക്ക് ഒരുങ്ങുന്ന ഇന്ത്യന്‍ ടീമിനെ തേടി മറ്റൊരു തിരിച്ചടി വാര്‍ത്ത കൂടി. ഓപ്പണര്‍ ശിഖര്‍ ധവാന്റെ പരിക്കിന് പിന്നാലെ ടെസ്റ്റ് സ്‌പെഷ്യലിസ്റ്റായ പേസര്‍ ഇഷാന്ത് ശര്‍മ്മയ്ക്കും പരിക്കേറ്റു.
രഞ്ജി ട്രോഫി മത്സരത്തില്‍ ഡല്‍ഹിക്കു വേണ്ടി കളിക്കുമ്പോഴായിരുന്നു താരത്തിന് പരിക്കേറ്റത്. വിദര്‍ഭയ്ക്കെതിരെയായിരുന്നു മത്സരം.
വിദര്‍ഭയ്ക്കെതിരെ ബൗള്‍ ചെയ്യുകയായിരുന്ന ഇശാന്ത് ശര്‍മ്മ പന്ത് ബൗള്‍ ചെയ്ത ശേഷം എല്‍ബി വിക്കറ്റിനായി അപ്പീല്‍ ചെയ്യുന്നതിനിടെയാണ് പരിക്കേറ്റത്. മൈതാനത്ത് തെന്നി വീണ ഇഷാന്തിന്റെ ആംഗിളിനാണ് പരിക്കേറ്റിരിക്കുന്നത്. വേദനകൊണ്ട് പുളഞ്ഞ ഇശാന്ത് ശര്‍മ്മയെ ഉടന്‍ മൈതാനത്ത് നിന്നും മാറ്റുകയായിരുന്നു.
ഇതോടെ ന്യൂസിലന്‍ഡില്‍ പന്തെറിയാന്‍ ഇഷാന്ത് ഉണ്ടാകുമോയെന്ന കാര്യം ആശങ്കയിലായി. നേരത്തെ ഓസ്‌ട്രേലിയക്കെതിരെ മൂന്നാം ഏകദിനത്തില്‍ ഫീല്‍ഡ് ചെയ്യുന്നതിനിടെ ഇന്ത്യന്‍ ഓപ്പണര്‍ ശിഖര്‍ ധവാനും പരിക്കേറ്റിരുന്നു.
Read more
ഈ മാസം 24 -ന് ആരംഭിയ്ക്കുന്ന പരമ്പരയില്‍ മൂന്ന് വീതം ടി20, ഏകദിന, ടെസ്റ്റ് മത്സരങ്ങളാണ് ഉളളത്. ഈ വര്‍ഷത്തെ ഇന്ത്യയുടെ ആദ്യ വിദേശ പര്യടനം കൂടിയാണ് ന്യൂസിലാന്‍ഡിലേത്.
