ധോണി ചെന്നൈയില്‍; സൂപ്പര്‍ കിംഗ്‌സ് പടയൊരുക്കം തുടങ്ങി

ഐ.പി.എല്‍ 14ാം സീസണിന് മുന്നോടിയായി ചെന്നൈ സൂപ്പര്‍ കിംഗ്സ് ക്യാപ്റ്റന്‍ എം.എസ് ധോണി ചെന്നൈയിലെത്തി. ബുധനാഴ്ചയാണ് താരം ചെന്നൈയില്‍ വിമാനമിറങ്ങിയത്. ധോണിയുടെ കീഴില്‍ സീസണ് മുമ്പുള്ള പരിശീലന ക്യാമ്പിനുള്ള തയ്യാറെടുപ്പിലാണ് സൂപ്പര്‍ കിംഗ്‌സ്.

മാര്‍ച്ച് രണ്ടാം വാരം മുതല്‍ ചെന്നൈയില്‍ സൂപ്പര്‍ കിംഗ്‌സിന്റെ പരിശീലന ക്യാമ്പ് ആരംഭിക്കുമെന്നാണ് റിപ്പോര്‍ട്ടുകള്‍. ഈ സീസണില്‍ മോയിന്‍ അലി, കൃഷ്ണപ്പ ഗൗതം, ചേതേശ്വര്‍ പൂജാര തുടങ്ങിയ താരങ്ങളും സൂപ്പര്‍ കിംഗ്‌സിനൊപ്പമുണ്ട്.

Image

സൂപ്പര്‍ കിംഗ്സ് താരം അമ്പാട്ടി റായുഡുവും നേരത്തെ ചെന്നൈയിലെത്തിയിരുന്നു. ധോണിയും ചില ആഭ്യന്തര താരങ്ങളും ഈ ആഴ്ച ക്യാമ്പില്‍ ഒത്തുചേരും. ഏപ്രില്‍-മെയ് മാസങ്ങളിലായാണ് ഐ.പി.എല്‍ നടക്കുക.

ഇന്ത്യയില്‍ കോവിഡ് വ്യാപനം ശക്തമായി തുടരുന്ന സാഹചര്യത്തില്‍ പരിമിതമായ വേദികളില്‍ ടൂര്‍ണമെന്റ് നടത്താനാണ് ബി.സി.സി.ഐ ആലോചിക്കുന്നത്. നിലവില്‍ ചെന്നൈ, അഹമ്മദാബാദ്, കൊല്‍ക്കത്ത, ഡല്‍ഹി, ബംഗളൂരു എന്നിവിടങ്ങളാണ് ടൂര്‍ണമെന്റിന് വേദിയാകുമെന്ന് അറിയുന്നത്.