ഐ.പി.എല്‍ 13ാം സീസണില്‍ കിംഗ്‌സ് ഇലവന്‍ പഞ്ചാബിനെതിരെ ആദ്യ മത്സരത്തിനിറങ്ങാനൊരുങ്ങുന്ന ഡല്‍ഹി ക്യാപിറ്റല്‍സിന് അപ്രതീക്ഷിത തിരിച്ചടി. പരിശീനത്തിനിടെ പേസ് ബൗളര്‍ ഇഷാന്ത് ശര്‍മ്മയ്ക്ക് പരിക്കേറ്റതാണ് ഡല്‍ഹിയ്ക്ക് തിരിച്ചടിയായിരിക്കുന്നത്. പരിക്ക് അല്‍പ്പം സാരമുള്ളതാണെന്നും പഞ്ചാബിനെതിരെ നടക്കുന്ന മത്സരത്തില്‍ ഇഷാന്ത് കളിക്കില്ലെന്നുമാണ് വിവരം. ബോളിംഗ് നിരയില്‍ ഇഷാന്തിന്റെ അഭാവം ടീമിന് തലവേദനയാകുമെന്ന് ഉറപ്പാണ്.
ഇഷാന്തിന്റെ അഭാവത്തില്‍ റബാഡ, മോഹിത് ശര്‍മ, ആന്‍ റിച്ച് നോര്‍ജ, ആവേഷ് ഖാന്‍, ഹര്‍ഷല്‍ പട്ടേല്‍, കീമോ പോള്‍ എന്നിവര്‍ക്കായിരിക്കും പേസ് ചുമതല. ആര്‍.അശ്വിന്‍, അമിത് മിശ്ര, അക്സര്‍ പട്ടേല്‍ എന്നിവര്‍ സ്പിന്നിലും ഡല്‍ഹിയുടെ മൂര്‍ച്ചയുള്ള ആയുധങ്ങളാണ്.
ബാറ്റ്സ്മാന്‍മാരെ നന്നായി പിന്തുണയ്ക്കുന്ന മൈതാനമാണ് ദുബായിലേത്. ഇവിടെ നടന്ന ടി20 മത്സരങ്ങളില്‍ ആദ്യം ബാറ്റ് ചെയ്ത് പല ടീമും 200ന് മുകളില്‍ സ്‌കോര്‍ നേടിയിട്ടുണ്ട്. അതിനാല്‍ തന്നെ നല്ലൊരു ബാറ്റിംഗ് പ്രകടനം ഇന്നത്തെ കളിയില്‍ ആരാധകര്‍ക്ക് പ്രതീക്ഷിക്കാം.
Read more
ദുബായ് ഇന്റര്‍നാഷണല്‍ സ്റ്റേഡിയത്തില്‍ ഇന്ത്യന്‍ സമയം ഇന്ന് വൈകിട്ട് 7.30 നാണ് മത്സരം. കെ.എല്‍ രാഹുല്‍ പഞ്ചാബിനെ നയിക്കുമ്പോള്‍ ശ്രേയസ് അയ്യര്‍ക്കാണ് ഡല്‍ഹിയുടെ കടിഞ്ഞാണ്‍.
