കോഹ്ലിയുടെ സഞ്ജുപ്പക തുടരുന്നു. ഒന്ന് പേരിനെങ്കിലും പരീക്ഷിയ്ക്കൂ!

ശ്രീലങ്കയ്‌ക്കെതിരെ ആദ്യ ടി20യിലും മലയാളി താരം സഞ്ജു സാംസണിന് ഇന്ത്യന്‍ ടീമിന്റെ പ്ലേയിംഗ് ഇലവനില്‍ സ്ഥാനം ലഭിച്ചില്ല. ഗുവാഹാത്തിയില്‍ നടന്ന ആദ്യ ടി20 മഴമൂലം ഉപേക്ഷിച്ചുവെങ്കിലും ടോസ് ഇട്ട ശേഷമായിരുന്നു മത്സരം നടക്കാതെ പോയത്.

ഇതോടെയാണ് സഞ്ജു പ്ലേയിംഗ് ഇലവനില്‍ ഇല്ലെന്ന കാര്യം ബോദ്ധ്യമായത്. റിഷഭ് പന്ത് തന്നെയാണ് ഇന്ത്യയുടെ വിക്കറ്റ് കീപ്പര്‍.

പരിക്കില്‍ നിന്ന് മുക്തനായി മടങ്ങിയെത്തിയ ശിഖര്‍ ധവാനൊപ്പം മികച്ച ഫോമില്‍ തുടരുന്ന കെ.എല്‍ രാഹുല്‍ തന്നെയായിരിക്കും ഇന്ത്യന്‍ ഇന്നിംഗ്സ് ഓപ്പണ്‍ ചെയ്യുന്നത്. മൂന്നാം നമ്പരില്‍ നായകന്‍ ഒരിക്കല്‍ കൂടി പരീക്ഷണത്തിന് ശ്രമിച്ചാല്‍ പന്തിനോ ദുബെയ്‌ക്കോ സ്ഥാനക്കയറ്റം ലഭിക്കും. ഇല്ലെങ്കില്‍ കോഹ്ലി തന്നെയായിരിക്കും മൂന്നാം നമ്പരില്‍ കളിക്കുക.

യുവതാരങ്ങളായ ശ്രേയസ് അയ്യറും ശിവം ദുബെയും വാഷിംഗ് ടണ്‍ സുന്ദറും ടീം ഇന്ത്യയില്‍ ഇടംപിടിച്ചപ്പോഴാണ് തുടര്‍ച്ചയായ മൂന്നാം പരമ്പരയിലും സഞ്ജു ടീമിന് പുറത്തിരിയ്ക്കുന്നത്. നേരത്തെ വെസ്റ്റിന്‍ഡീസിനെതിരേയും ബംഗ്ലാദേശിനെതിരേയുമായിരുന്നു സഞ്ജു ഇന്ത്യന്‍ ടീമില്‍ ഇടംപിടിച്ചത്.

കേരളത്തിനായി അഭ്യന്തര ക്രിക്കറ്റിലെ മികച്ച പ്രകടനമാണ് സഞ്ജുവിനെ ഒരിക്കല്‍ കൂടി ടീം ഇന്ത്യയിലേക്കെത്തിച്ചത്. കഴിഞ്ഞ ഐപിഎല്ലിലും സെഞ്ച്വറി ഉള്‍പ്പെടെ തകര്‍പ്പന്‍ ബാറ്റിംഗ് പ്രകടനമായിരുന്നു സഞ്ജു കാഴ്ച്ചവെച്ചത്. എന്നാല്‍ പ്ലെയിംഗ് ഇലവനില്‍ ഒരിക്കല്‍ പോലും അവസരം നല്‍കാന്‍ ടീം ഇന്ത്യ തയ്യാറായിട്ടില്ല.