ടെസ്റ്റ്, ടി20 പര്യടനത്തിനായി ഇംഗ്ലണ്ടില്‍ എത്തിയ ഇന്ത്യന്‍ ടീം പരിശീലനം ആരംഭിച്ചു. ദൈര്‍ഘ്യമേറിയ പര്യടനത്തിനു മുമ്പ് രണ്ടു സന്നാഹ മല്‍സരങ്ങള്‍ ഇംഗ്ലണ്ടില്‍ ഇന്ത്യ കളിക്കുന്നുണ്ട്. ആദ്യത്തേത് ചതുര്‍ദിന മല്‍സരവും രണ്ടാമത്തേത് ടി20യുമാണ്. ലെസ്റ്റര്‍ഷെയറുമായുള്ള ചതുര്‍ദിന മല്‍സരം വെള്ളിയാഴ്ച ആരംഭിക്കും.
ഏറ്റവും ശക്തമായ ടീമിനെ തന്നെയായിരിക്കും ലെസ്റ്റര്‍ഷെയറിനെതിരേ ഇന്ത്യ ഇറക്കുകയെന്നാണ് സൂചന. രോഹിത് ശര്‍മയ്ക്കു കീഴില്‍ പ്രധാന താരങ്ങളെല്ലാം തന്നെ സന്നാഹത്തില്‍ ഇന്ത്യക്കു വേണ്ടി അണിനിരക്കും. രാഹുലിന്റെ അഭാവത്തില്‍ ശുഭ്മാന്‍ ഗില്ലായിരിക്കും രോഹിത്തിന്റെ ഓപ്പണിംഗ് പങ്കാളി.
വിരാട് കോഹ്‌ലി, ചേതേശ്വര്‍ പൂജാര, റിഷഭ് പന്ത്, രവീന്ദ്ര ജഡേജ, ജസ്പ്രീത് ബുംറ എന്നീ താരങ്ങളെല്ലാം സന്നാഹത്തിന് ഇറങ്ങുമെന്നാണ് അറിയുന്നത്. കഴിഞ്ഞ വര്‍ഷം കോവിഡ് സാഹചര്യത്തില്‍ നിര്‍ത്തിയ അഞ്ച് മത്സരങ്ങളുടെ ടെസ്റ്റ് പരമ്പരയിലെ അവസാന മത്സരമാണ് ഇന്ത്യ പൂര്‍ത്തിയാക്കാനൊരുങ്ങുന്നത്.
പുനഃക്രമീകരിച്ച അഞ്ചാം ടെസ്റ്റ് ജൂലൈ 1-5 വരെ ബര്‍മിംഗ്ഹാമിലാണ് നടക്കുക. പരമ്പരയില്‍ നിലവില്‍ ഇന്ത്യ 2-1 ന് മുന്നിലാണ്. ഈ ടെസ്റ്റിന് ശേഷം ഇന്ത്യയും ഇംഗ്ലണ്ടും മൂന്ന് ഏകദിനങ്ങളിലും മൂന്ന് ടി20യും കളിക്കും.
Read more
ടെസ്റ്റ് സാധ്യത ഇലവന്‍: രോഹിത് ശര്‍മ, ശുഭ്മാന്‍ ഗില്‍, വിരാട് കോഹ്‌ലി, ചേതേശ്വര്‍ പുജാര, റിഷഭ് പന്ത്, രവീന്ദ്ര ജഡേജ, ആര്‍ അശ്വിന്‍, ശര്‍ദുല്‍ താക്കൂര്‍/പ്രസിദ്ധ് കൃഷ്ണ, മുഹമ്മദ് ഷമി, ജസ്പ്രീത് ബുംറ, മുഹമ്മദ് സിറാജ്.
