യുവ വെടിക്കെട്ട് ഓപ്പണര്‍ പൃഥ്വി ഷായെ അവസരം നല്‍കാതെ മാറ്റിനിര്‍ത്തുന്നതിനെ വിമര്‍ശിച്ച് ആരാധകര്‍. സിംബാബ്‌വെയ്‌ക്കെതിരായ ഏകദിന പരമ്പരയ്ക്കുള്ള സ്‌ക്വാഡിനെ ഇന്നലെ ബിസിസിഐ പ്രഖ്യാപിച്ചപ്പോഴും ഷായെ തഴഞ്ഞിരുന്നു. സീനിയര്‍ താരങ്ങള്‍ക്ക് വിശ്രമം നല്‍കി ഇന്ത്യ രണ്ടാം നിര ടീമിനെ പരിഗണിക്കുമ്പോള്‍ ഷായെ മാറ്റിനിര്‍ത്തുന്നത് അംഗീകരിക്കാനാവുന്നതല്ല എന്നാണ് ആരാധകര്‍ പറയുന്നത്.
പൃഥ്വി ഷായെന്ന ഒരു കളിക്കാരന്‍ ഉണ്ടെന്നു പോലും അവര്‍ മറന്നോയെന്നാണ് ട്വിറ്ററിലൂടെ ഒരു ആരാധകന്‍ ചോദിച്ചത്. ലാന്‍ഡ് റോവര്‍ (പൃഥ്വി ഷാ) വാങ്ങാനുള്ള കഴിവുണ്ടായിട്ടും ഇപ്പോഴും പഴയ സ്‌കോര്‍പ്പിയോ (ശിഖര്‍ ധവാന്‍) ഓടിക്കുന്നത് പോലെയാണ് ഇതെന്നായിരുന്നു ഒരു ആരാധകന്റെ പ്രതികരണം.
എന്തുകൊണ്ട് പൃഥ്വി ഷാ മങ്ങിപ്പോയി. ഇപ്പോള്‍ ഒരുപാട് കുട്ടികള്‍ക്കു അവസരം ലഭിക്കുന്നുണ്ട്. പൃഥ്വിക്കു കൂടുതല്‍ മല്‍സരങ്ങള്‍ ആവശ്യമാണെന്നുമായിരുന്നു ഒരു പ്രതികരണം. സൗത്ത് ഇന്ത്യന്‍ ലോബി കാരണം അവസരം നഷ്ട്ടപ്പെട്ട ഇന്ത്യയുടെ ഭാവി നായകന്‍ എന്നായിരുന്നു ഹാസ്യത്തില്‍ ചാലിച്ച മറ്റൊരു വ്യത്യസ്ത പ്രതികരണം.
2021 ജൂലൈയിലാണ് പൃഥ്വി ഷാ അവസാനമായി ഇന്ത്യക്ക് വേണ്ടി കളിച്ചത്. ശ്രീലങ്കക്കെതിരായ ടി20യിലായിരുന്നു ഇത്. ഇതിന് ശേഷം താരത്തിന് ഇന്ത്യന്‍ ടീമിലേക്ക് വിളിയെത്തിയിട്ടില്ല.
Read more
എന്തുകൊണ്ട് പൃഥ്വിക്ക് ടീമില്‍ ഇടം നേടാനാവുന്നില്ല എന്നത് അത്ഭുതപ്പെടുത്തുന്നതാണ്. എന്തുകൊണ്ട് അവന്‍ ടീമിലേക്ക് എത്തുന്നില്ല എന്നതിലെ ആദ്യ കാരണം ഫിറ്റ്നസ് ആണ്. ഐപിഎല്ലില്‍ പൃഥ്വി നന്നായി തുടങ്ങിയെങ്കിലും ടൂര്‍ണമെന്‍റ് പുരോഗമിക്കുന്തോറും പിന്നോട്ട് പോകുന്ന അവസ്ഥയാണ് കാണാനായത്.
