ഇന്ത്യ ടെസ്റ്റ് ക്രിക്കറ്റ് ടീമില്‍ നടത്തുന്ന ഏറ്റവും പുതിയ പരീക്ഷണമാണ് ഓപ്പണറായി സ്റ്റാര്‍ ബാറ്റ്‌സ്മാന്‍ രോഹിത്ത് ശര്‍മ്മയെ അവതരിപ്പിക്കുന്നത്. ഇതുവരെ ടെസ്റ്റില്‍ ഓപ്പണ്‍ ചെയ്യാത്ത രോഹിത്ത് ഈ പരീക്ഷണം എങ്ങനെ അതിജീവിക്കുമെന്ന് ഉറ്റുനോക്കുകയാണ് ക്രിക്കറ്റ് ലോകം.
അതെസമയം രോഹിത്തെങ്ങാനും ഓപ്പണറായി വിജയിച്ചാല്‍ അത് ടെസ്റ്റില്‍ ടീം ഇന്ത്യ എഴുതുന്ന പുതുചരിത്രമായിരിക്കുമെന്ന് ഈയടുത്ത് പുറത്താക്കപ്പെട്ട ഇന്ത്യന്‍ ബാറ്റിംഗ് കോച്ച് സഞ്ജയ് ബംഗാര്‍ നിരീക്ഷിക്കുന്നു. ഇഎസ്പിഎന്‍ ക്രിക്ക് ഇന്‍ഫോയോട് സംസാരിക്കുമ്പോഴാണ് രോഹിത്തിനെ ടെസ്റ്റ് ഓപ്പണറാക്കുന്ന കാര്യത്തില്‍ ബംഗാര്‍ മനസ്സ് തുറന്നത്.
“ടെസ്റ്റ് ടീമില്‍ മധ്യനിരയില്‍ ഇപ്പോള്‍ രോഹിത്തിന് അവസരമില്ല. ഓപ്പണറാകുക എന്നത് രോഹിത്തിനെ സംബന്ധിച്ച് പുതിയ വെല്ലുവിളിയാണ്. എന്തുകൊണ്ടെന്നാല്‍ ടെസ്റ്റ് ക്രിക്കറ്റില്‍ ഇതുവരെ രോഹിത്ത് അധികം കഴിവ് തെളിച്ചിട്ടില്ല. എന്നാല്‍ അവനുളള ഗുണമെന്തെന്നാല്‍ പ്രയാസമേറിയ പന്തുകള്‍ പോലും ഗ്യാപ്പുകള്‍ കണ്ടെത്തി കളിക്കാന്‍ കഴിയും എന്നതാണ്. അതിനായി അവന് ബാറ്റ് തിരിക്കേണ്ട ആവശ്യവുമില്ല. ആ ശൈലി മാനസികമായി ഊര്‍ജ്ജം നിലനിര്‍ത്താന്‍ സഹായിക്കും” ബംഗാര്‍ പറയുന്നു.
“അവന് തന്റെ സ്വതസിദ്ധമായ ശൈലിയില്‍ ഓപ്പണിംഗ് സ്ഥാനത്ത് കഴിവ് തെളിക്കാന്‍ കഴിഞ്ഞാല്‍ അത് ടീമിന് വലിയ സഹായകരമാകും. അതിന്റെ ഫലം നമുക്ക് കഴിഞ്ഞ കാലങ്ങളില്‍ എത്തിപ്പിടിക്കാനാകാത്ത വിജയലക്ഷ്യങ്ങള്‍ വരെ മറികടക്കാനുളള കരുത്ത് നല്‍കും എന്നതാണ്” ബംഗാര്‍ കൂട്ടിചേര്‍ത്തു.
സ്വന്തം ശൈലിയില്‍ വിശ്വാസമര്‍പ്പിച്ച് കളിക്കുക എന്നതാണ് ടെസ്റ്റ് ഓപ്പണറായി വിജയിക്കാന്‍ രോഹിത്തിനെ സഹായിക്കുകയെന്നും ബംഗാര്‍ കൂട്ടിചേര്‍ത്തു.
Read more
മൂന്ന് ടെസ്റ്റ് മത്സരങ്ങളാണ് ഇന്ത്യ ദക്ഷിണാഫ്രിക്കയ്ക്ക് എതിരെ കളിക്കുക. ടെസ്റ്റ് പരമ്പരയ്ക്ക് മുന്നോടിയായി ഇന്ത്യ ടി20 പരമ്പരയും കളിക്കുന്നുണ്ട്.
