ഐസിസിയുടെ ഏറ്റവും പുതിയ ടി20 റാങ്കിങില്‍ മികച്ച നേട്ടം സ്വന്തമാക്കി ഇന്ത്യന്‍ ഓപ്പണര്‍ കെഎല്‍ രാഹുല്‍. കരിയറിലെ ഏറ്റവും മികച്ച റാങ്കിങ്ങുമായി രണ്ടാം സ്ഥാനത്താണ് രാഹുല്‍. പാക്കിസ്ഥാന്റെ ബാബര്‍ അസമാണ് ഒന്നാം സ്ഥാനത്തുളളത്. ന്യൂസിലന്‍ഡിനെതിരായ ടി20 പരമ്പരയില്‍ മികച്ച പ്രകടനം കാഴ്ച്ചവെച്ചതാണ് രാഹുലിന് തുണയായത്.
ന്യൂസിലന്‍ഡിനെതിരായ അഞ്ച് മത്സരങ്ങളടങ്ങിയ പരമ്പരയില്‍ 224 റണ്‍സടിച്ചാണ് രാഹുല്‍ രണ്ടാം സ്ഥാനത്തേക്ക് കുതിച്ചു കയറിയത്. നാല് സ്ഥാനം മുന്നോട്ടു കയറിയ രാഹുലിന് ആകെ 823 പോയിന്റുണ്ട്. 879 പോയിന്റോടെയാണ് ബാബര്‍ അസം ഒന്നാമത് നില്‍ക്കുന്നത്.
അതേസമയം, ബൗളര്‍മാരുടെ റാങ്കിങ്ങില്‍ ഇന്ത്യക്കാര്‍ ആരും ആദ്യ പത്തിലില്ല. എ്ന്നാല്‍ 26 സ്ഥാനങ്ങള്‍ മുന്നോട്ട് കയറി ഭുംറ 11ാം സ്ഥാനത്തെത്തി. ഏകദിനത്തില്‍ ഒന്നാം നമ്പര്‍ ബൗളറാണ് ഭുംറ. അഫ്ഗാന്‍ താരം റാഷിദ് ഖാന്‍ 749 പോയിന്റുമായി ഒന്നാമതു നില്‍ക്കുന്ന പട്ടികയില്‍ അഫ്ഗാന്റെ തന്നെ മുജീബുര്‍ റഹ്മാനാണ് (742) രണ്ടാമത്. മിച്ചല്‍ സാന്റ്‌നര്‍, ആദം സാംപ, ഇമാദ് വാസിം എന്നിവരാണ് ആദ്യ അഞ്ച് സ്ഥാനങ്ങളില്‍. വാഷിങ്ടണ്‍ സുന്ദര്‍ 22ാം സ്ഥാനത്തും നില്‍ക്കുന്നു.
Read more
ടീമുകളുടെ പട്ടികയില്‍ 270 പോയിന്റുമായി പാകിസ്ഥാനാണ് ഒന്നാമത്. ഓസ്‌ട്രേലിയ, ഇംഗ്ലണ്ട് ടീമുകള്‍ രണ്ടും മൂന്നും സ്ഥാനങ്ങളിലുണ്ട്. 265 റേറ്റിങ് പോയിന്റുമായി നാലാം സ്ഥാനത്താണ് ഇന്ത്യ.
