ധോണിയേക്കാള്‍ മികച്ച ഇന്ത്യന്‍ ക്യാപ്റ്റന്‍മാര്‍ ഉണ്ടായിട്ടുണ്ട്, പേര് വെളിപ്പെടുത്തി ഗംഭീര്‍

ഇന്ത്യന്‍ ടീമിന് മഹേന്ദ്ര സിംഗ് ധോണിയേക്കാള്‍ മികച്ച നായകന്മാര്‍ ഉണ്ടായിട്ടുണ്ടെന്ന് മുന്‍ ഇന്ത്യന്‍ താരവും ബി.ജെ.പി, എം.പിയുമായ ഗൗതം ഗംഭീര്‍. സൗരവ് ഗാംഗുലി, അനില്‍ കുംബ്ലെ, രാഹുല്‍ ദ്രാവിഡ്, വിരാട് കോഹ്ലി എന്നീ താരങ്ങളേയാണ് ധോണിയേക്കാള്‍ മികച്ച നായകന്മാരായി ഗംഭീര്‍ വിലയിരുത്തുന്നത്. ടിവി 9ന് നല്‍കിയ അഭിമുഖത്തില്‍ സംസാരിക്കുകയായിരുന്നു ഗംഭീര്‍.

‘കണക്കുകള്‍ നോക്കിയാല്‍ ധോണിയായിരിക്കാം ഇന്ത്യയുടെ മികച്ച ക്യാപ്റ്റന്‍. എന്നാല്‍ അതിനര്‍ത്ഥം മറ്റു ക്യാപ്റ്റന്മാര്‍ മോശമാണെന്നല്ല. ഗാംഗുലി മികച്ച ക്യാപ്റ്റനായിരുന്നു. അദ്ദേഹത്തിന് കീഴില്‍ വിദേശത്ത് ജയിക്കാന്‍ ടീമിന് സാധിച്ചു. കോഹ്ലിക്ക് കീഴില്‍ നമ്മള്‍ ഓസ്ട്രേലിയയിലും ദക്ഷിണാഫ്രിക്കയിലും വരെ ഏകദിന പരമ്പര വിജയിച്ചു’ ഗംഭീര്‍ പറയുന്നു

‘ശരിയാണ് ധോണിക്ക് കീഴില്‍ ഇന്ത്യ രണ്ട് ലോക കപ്പ് നേടിയിട്ടുണ്ട്. ഒരു ചാമ്പ്യന്‍സ് ട്രോഫിയും. എന്നാല്‍ നേട്ടം ധോണിക്ക് മാത്രം അവകാശപ്പെട്ടതല്ല. ടീമിലെ ഓരോ താരവും അതിന് അര്‍ഹരാണ്. കുംബ്ലെ, രാഹുല്‍ ദ്രാവിഡ് എന്നിവരും ഇന്ത്യയെ മികച്ച രീതിയില്‍ മുന്നോട്ട് നയിച്ചിട്ടുള്ളവരാണ്.’ ഗംഭീര്‍ കൂട്ടിച്ചേര്‍ത്തു.

മഹേന്ദ്ര സിംഗ് ധോണിയുടെ വിരമിക്കലിനായി മുറവിളി ഉയരുന്നതിനിടേയാണ് ഗംഭീറിന്റെ പുതിയ പ്രസ്താവന പുറത്ത് വരുന്നത്. ധോണിയ്ക്ക് കീഴില്‍ ഇന്ത്യ 60 ടെസ്റ്റുകളും 200 ഏകദിനങ്ങളും 72 ടി20കളും കളിച്ചിട്ടുണ്ട്. ഇതില്‍ യഥാക്രമം 27, 110, 41 മത്സരങ്ങളില്‍ വിജയിക്കുകയും ചെയ്തു.