ഒന്നാം ഏകദിനത്തില് ഇംഗ്ലണ്ടിനെതിരെ മിന്നും ജയം നേടിയിരിക്കുകയാണ് ഇന്ത്യ. തീപാറുമെന്നു പ്രവചിക്കപ്പെട്ടിരുന്ന മല്സരം വെറും നനഞ്ഞ പടക്കമായി മാറിയപ്പോള് ഇന്ത്യ പാട്ടുംപാടി ആദ്യ ഏകദിനം ജയിച്ചുകയറുകയായിരുന്നു. ഇന്ത്യന് ജയത്തിനു പിന്നാലെ ട്രോളന്മാരുടെ പരിഹാസം ഏറ്റുവാങ്ങിയിരിക്കുകയാണ് ഇംഗ്ലണ്ട് മുന് നായകന് മൈക്കല് വോണ്. മത്സരത്തിന് മുമ്പ് നടത്തിയ പ്രവചനമാണ് താരത്തിന് തിരിച്ചടിയായിരിക്കുന്നത്.
ഇന്ത്യയ്ക്കെതിരെ ഇംഗ്ലണ്ട് 400 റണ്സ് നേടുമെന്നായിരുന്നു വോണിന്റെ പ്രവചനം. ‘ഇംഗ്ലണ്ട് ശക്തമാകും, വിക്കറ്റ് പരന്നതായിരിക്കും. നെതര്ലാന്ഡിനെതിരെ ഇംഗ്ലണ്ട് 498 റണ്സ് നേടി, ഇന്ത്യയ്ക്കെതിരെ അത് സാധ്യമല്ല, പക്ഷേ 400 സ്കോര് ചെയ്യും എന്നുറപ്പാണ്’ എന്നായിരുന്നു വോണ് പറഞ്ഞത്.
എന്നാല് 100 കടക്കാന് പാടുപെടുന്ന ഇംഗ്ലീഷ് പടയെയാണ് ഇന്നലെ കാണാനായത്. മത്സരത്തില് ടോസ് നഷ്ടപ്പെട്ട് ബാറ്റിംഗിനിറങ്ങിയ ഇംഗ്ലണ്ട് വെറും 111 റണ്സാണ് വിജയലക്ഷ്യമായി ഇന്ത്യക്കു മുന്നില് വച്ചത്. ജസ്പ്രീത് ബുംറയുടെ മാജിക്കല് ബോളിംഗായിരുന്നു ഇംഗ്ലണ്ടിനെ തരിപ്പണമാക്കിയത്. 7.2 ഓവറില് മൂന്നു മെയ്ഡനടക്കം 19 റണ്സ് മാത്രം വിട്ടുകൊടുത്ത് 6 വിക്കറ്റാണ് ബുംറ വീഴ്ത്തിയത്. മൂന്നു വിക്കറ്റുകളെടുത്ത മുഹമ്മദ് ഷമി അദ്ദേഹത്തിനു മികച്ച പിന്തുണയേകി. പ്രസിദ്ധ് കൃഷ്ണയ്ക്കു ഒരു വിക്കറ്റും ലഭിച്ചു.
മറുപടി ബാറ്റിംഗില് തുടക്കത്തിലെ കുറച്ച് ഓവറുകളില് റണ്ണെടുക്കാന് വിഷമിച്ചെങ്കിലും പിന്നീട് രോഹിത്- ശിഖര് ധവാന് ജോടി കത്തിക്കയറി. 18.4 ഓവറില് തന്നെ ഇന്ത്യ വിജയറണ് കുറിച്ചു രോഹിത് 76ഉം ധവാന് 31ഉം റണ്സെടുത്തു.