പാകിസ്ഥാനെതിരെ നടക്കുന്ന ടെസ്റ്റ് പരമ്പരയില്‍ നിന്ന് ഇംഗ്ലണ്ട് ഓള്‍റൗണ്ടര്‍ ബെന്‍ സ്റ്റോക്സ് പിന്മാറി. ഇംഗ്ലണ്ട് ക്രിക്കറ്റ് ബോര്‍ഡാണ് ഇക്കാര്യമറിയിച്ചത്. കുടുംബത്തോടൊപ്പം സമയം ചെലവഴിക്കാനാണ് താരത്തിന്റെ പിന്മാറ്റമെന്നാണ് വിശദീകരണം. എന്നാല്‍ പാകിസ്ഥാനെതിരെ നടന്ന ഒന്നാം ക്രിക്കറ്റ് ടെസ്റ്റില്‍ സ്റ്റോക്‌സിന് കാര്യമായ സംഭാവന കഴിയാന്‍ സാധിച്ചിരുന്നില്ല.
സ്റ്റോക്സിന്റെ പിതാവ് ഗ്രെഡിനെ കഴിഞ്ഞ ഡിസംബറില്‍ അസുഖ ബാധിതനായി ദക്ഷിണാഫ്രിക്കയിലെ ആശുപത്രിയില്‍ പ്രവേശിപ്പിച്ചിരുന്നു. ഇപ്പോള്‍ ജന്മനാടായ ന്യൂസിലാന്‍ഡിലെ ക്രൈസ്റ്റ്ചര്‍ച്ചില്‍ അദ്ദേഹം സുഖം പ്രാപിച്ചുവരികയാണെന്നാണ് വിവരം.
പരമ്പര പാതിവഴിയില്‍ ഉപേക്ഷിച്ച സ്റ്റോക്സ് ഈയാഴ്ച ന്യൂസിലാന്‍ഡിലേക്കു പോകും. ഈ സമയത്തു താരത്തിന്റെ കുടുംബത്തിന്റെ സ്വകാര്യതയെ മാനിക്കണമെന്നു ഇംഗ്ലണ്ട് ആന്റ് വെയ്ല്‍സ് ക്രിക്കറ്റ് ബോര്‍ഡും സ്റ്റോക്സിന്റെ കുടുംബവും എല്ലാ മാധ്യമങ്ങളോടും അഭ്യര്‍ത്ഥിക്കുകയാണെന്ന് വാര്‍ത്താക്കുറിപ്പില്‍ പറയുന്നു.
Read more
പാകിസ്ഥാനെതിരെ തിളങ്ങാനായില്ലെങ്കിലും വിന്‍ഡീസിനെതിരെ നടന്ന ടെസ്റ്റില്‍ മികച്ച പ്രകടനമായിരുന്നു സ്റ്റോക്‌സിന്റേത്. ഈ പ്രകടനത്തെ പ്രകീര്‍ത്തിച്ച് ക്രിക്കറ്റ് ലോകം ഒന്നടങ്കം രംഗത്ത് വന്നിരുന്നു. നിലവില്‍ ലോകത്തിലെ നമ്പര്‍ വണ്‍ ടെസ്റ്റ് ഓള്‍റൗണ്ടര്‍ കൂടിയാണ് സ്റ്റോക്സ്.
