കന്നി സെഞ്ച്വറി നേടിയതു മുതല് എം. എസ് ധോണി എല്ലാ യുവതാരങ്ങള്ക്കും പ്രചോദനമാണെന്ന സഞ്ജു സാംസണ്. ധോണിയെ പോലെ ഒട്ടുംതന്നെ ക്രിക്കറ്റ് പശ്ചാത്തലമില്ലാത്ത സ്ഥലത്തു നിന്നാണ് താനും വരുന്നതെന്നും അത് ഏറെ പ്രചോദനം നല്കുന്ന കാര്യമാണെന്നും സഞ്ജു പറഞ്ഞു.
“ബംഗ്ലാദേശിനെതിരായ മത്സരത്തിലൂടെ രാജ്യാന്തര ക്രിക്കറ്റില് അരങ്ങേറി പിന്നീട് പാകിസ്ഥാനെതിരെ തന്റെ കന്നി സെഞ്ച്വറി കുറിച്ച അന്നുമുതല് ധോണി ഭായി എല്ലാ യുവതാരങ്ങള്ക്കും പ്രചോദനമാണ്. റാഞ്ചിയില് നിന്ന് വന്ന് ഇത്രയും മികച്ചൊരു കരിയര് കെട്ടിപ്പടുത്തയാളെന്ന നിലയില് കേരളത്തില് നിന്നുള്ള എനിക്ക് അദ്ദേഹം ഏറെ ആത്മവിശ്വാസം നല്കുന്നു. കാരണം, ഈ രണ്ടു സ്ഥലങ്ങളും വലിയ ക്രിക്കറ്റ് പാരമ്പര്യം അവകാശപ്പെടാന് ഇല്ലാത്തവയാണ്.” ഗള്ഫ് ന്യൂസിന് നല്കിയ അഭിമുഖത്തില് സഞ്ജു പറഞ്ഞു.
തന്നെ സംബന്ധിച്ച് കഴിഞ്ഞ സീസണ് വളരെ മികച്ചതായിരുന്നുവെന്ന് സഞ്ജു പറഞ്ഞു. കുറഞ്ഞത് 10 വര്ഷമെങ്കിലും ഏറ്റവും മികവോടെ കളിക്കാന് തനിക്ക് സമയമുണ്ടെന്നും അത് മുതലാക്കാനാണ് ശ്രമമെന്നും സഞ്ജു വ്യക്തമാക്കി. ഐ.പി.എല്ലില് രാജസ്ഥാന് റോയല്സിന്റെ താരമാണ് സഞ്ജു.
Read more
യു.എ.ഇയില് സെപ്റ്റംബര് 19-നാണ് ഐ.പി.എല്ലിന്റെ 13ാം സീസണ് ആരംഭിക്കുന്നത്. 53 ദിവസം നീളുന്ന ടൂര്ണമെന്റിന് ദുബായ്, ഷാര്ജ, അബുദാബി എന്നിവിടങ്ങളിലെ സ്റ്റേഡിയങ്ങളാണ് വേദിയാവുക. നവംബര് 10-നാണ് ഫൈനല്.