ഇംഗ്ലണ്ട് ക്രിക്കറ്റ് ബോര്‍ഡ് ആരംഭിക്കാനിരിക്കുന്ന “ദി ഹണ്‍ട്രഡ്” ലീഗിലേക്ക് അണ്ടര്‍ 23 കളിക്കാരെ ഇന്ത്യ അയച്ചേക്കും. ഇന്ത്യക്കായി അരങ്ങേറ്റം കുറിച്ചിട്ടില്ലാത്ത അണ്ടര്‍ 23 കളിക്കാരെയാണ് അയക്കുക. എന്നാല്‍ ഇത് ബി.സി.സി.ഐയോ ഇംഗ്ലണ്ട് ക്രിക്കറ്റ് ബോര്‍ഡോ ഔദ്യോഗിക സ്ഥിരീകരിച്ചിട്ടില്ല.
നിലവില്‍ വിരമിച്ച കളിക്കാര്‍ക്ക് മാത്രമാണ് വിദേശ ലീഗുകളില്‍ കളിക്കാന്‍ അനുമതിയുള്ളത്. ദി ഹണ്‍ട്രഡ് ടൂര്‍ണമെന്റിന്റെ ആദ്യ സീസണ്‍ ഈ വര്‍ഷം ജൂലൈ 21ന് ആരംഭിക്കും. കഴിഞ്ഞ വര്‍ഷം ആരംഭിക്കേണ്ടിയിരുന്ന ടൂര്‍ണമെന്റ് കോവിഡ് മൂലമാണ് ഈ വര്‍ഷത്തേക്ക് മാറ്റിയത്.
വനിതാ വിഭാഗത്തിലും പുരുഷ വിഭാഗത്തിലും എട്ടു ടീമുകള്‍ വീതമാണ് ടൂര്‍ണമെന്റില്‍ പങ്കെടുക്കുന്നത്. മാഞ്ചസ്റ്റര്‍ ഒറിജിനല്‍സും ഓവല്‍ ഇന്വിന്‍സിബിള്‍സും തമ്മിലുള്ള മത്സരത്തോടെയാകും സീസണ്‍ ആരംഭിക്കുക. ആദ്യ വനിതാ ടീമിന്റെ മത്സരമാകും നടക്കുക. ജൂലൈ 22ന് മാഞ്ചസ്റ്ററിന്റെയും ഓവലിന്റെയും പുരുഷ ടീമുകള്‍ ഏറ്റുമുട്ടും.
Read more
എട്ടു വേദികളിലായാകും ടൂര്‍ണമെന്റ് നടക്കുക. ഓഗസ്റ്റ് 18നാകും ഗ്രൂപ്പ് ഘട്ട മത്സരങ്ങള്‍ അവസാനിക്കുക. ഓഗസ്റ്റ് 20ന് എലിമിനേറ്ററും ഓഗസ്റ്റ് 21ന് ഫൈനലും നടക്കും. ഇതാദ്യമായാണ് ഇംഗ്ലണ്ടില്‍ പുരുഷ ടൂര്‍ണമെന്റും വനിതാ ടൂര്‍ണമെന്റും ഒരേ സമയത്ത് ആരംഭിക്കുന്നത്.
