ടി20 ലോക കപ്പ് സെമിയുടെ പവര്‍ പ്ലേയില്‍ പാകിസ്ഥാന്റെ വിക്കറ്റുകള്‍ പിഴുതാല്‍ മാത്രമേ ഓസ്‌ട്രേലിയയ്ക്ക് ജയ സാധ്യതയുള്ളൂവെന്ന് പാക് പേസ് ഇതിഹാസം ഷൊയ്ബ് അക്തര്‍. അല്ലെങ്കില്‍ കംഗാരുപ്പട പരാജയം സമ്മതിച്ചുകൊടുക്കുമെന്നും അക്തര്‍ പറഞ്ഞു.
പവര്‍ പ്ലേയില്‍ ഓസ്‌ട്രേലിയയ്ക്ക് വിക്കറ്റൊന്നും ലഭിച്ചില്ലെങ്കില്‍ അവര്‍ തോല്‍വി സമ്മതിക്കും. ടോസ് നേടാനായില്ലെങ്കില്‍ ഓസീസ് തീര്‍ച്ചയായും മാനസികമായി തളരും. മുന്‍നിര അനായാസം റണ്‍സ് സ്‌കോര്‍ ചെയ്തില്ലെങ്കില്‍ അവര്‍ തകരും. പാകിസ്ഥാനാണ് ജയസാധ്യത കൂടുതല്‍. ആത്മവിശ്വാസത്തിന്റെ മാറ്റുരയ്ക്കലാണിത്. ഒരു രാജ്യം മുഴുവന്‍ പാക് ജയം ആഗ്രഹിക്കുന്നു. പാകിസ്ഥാന്‍ ടീമിന് അതു നേടാന്‍ കഴിയും- അക്തര്‍ പറഞ്ഞു.
Read more
ഓസ്‌ട്രേലിയയെ ആക്രമിക്കണമെങ്കില്‍, തുടക്കത്തില്‍ തന്നെ സ്പിന്നര്‍മാരായ ഇമാദ് വാസിമിനെയും മുഹമ്മദ് ഹഫീസിനെയുംകൊണ്ട് പന്തെറിയിക്കണം. പേസ് ബോളര്‍മാരെ മധ്യ, അവസാന ഓവറുകളിലേക്ക് കരുതിവയ്ക്കണം. സ്പിന്നര്‍മാരെ ഉപയോഗിച്ച് ഓസീസിനെ അസ്വസ്ഥരാക്കണം. കാരണം അവര്‍ സ്പിന്‍ നന്നായി കളിക്കില്ല. ഹഫീസിനെ നേരിടാന്‍ വാര്‍ണര്‍ ബുദ്ധിമുട്ടും. ഇമാദ് വാസിം ഫിഞ്ചിന് പ്രശ്‌നങ്ങള്‍ സൃഷ്ടിക്കുമെന്നും അക്തര്‍ വിലയിരുത്തി.
