ഐ.പി.എല്‍ 15ാം സീസണിന് മുമ്പായി മെഗാ താരലേലം നടക്കാനിരിക്കുകയാണ്. നിലവില്‍ ടീമിലുള്ള വെറും മൂന്നു പേരെ മാത്രമേ ആര്‍ടിഎം വഴി ഒരോ ഫ്രാഞ്ചൈസിക്കും നിലനിര്‍ത്താനാവുകയുള്ളൂ. ഇത് ഇത്തവണത്തെ പ്രകടനത്തിന്റെ പശ്ചാത്തലത്തില്‍ ബാംഗ്ലൂര്‍ റോയല്‍ ചലഞ്ചേഴ്‌സിന് തിരിച്ചടിയാകും. ഒരുപിടി നല്ല താരങ്ങളെ അവര്‍ക്ക് കൈവിടേണ്ടി വരും.
എന്നിരുന്നാലും നിലനിര്‍ത്തേണ്ട മൂന്ന് താരങ്ങളില്‍ രണ്ടു പേരുടെ കാര്യത്തില്‍ ബാംഗ്ലൂരിന് വ്യക്തമായ ധാരണയുണ്ടെന്നാണ് കരുതേണ്ടത്. ദക്ഷിണാഫ്രിക്കന്‍ സൂപ്പര്‍ താരം എബി ഡിവില്ലിയേഴ്‌സിനെയും ഇന്ത്യന്‍ നായകന്‍ വിരാട് കോഹ്‌ലിയെയും ബാംഗ്ലൂര്‍ നിലനിര്‍ത്തുമെന്ന് ഉറപ്പാണ്.
2011 മുതല്‍ ടീമിന്റെ ഭാഗമായ ഡിവില്ലിയേഴ്‌സിനെ വിട്ടുകളിക്കാന്‍ ബാംഗ്ലൂര്‍ മുതിരില്ലെന്നു തന്നെ വേണം കരുതാന്‍. കാരണം ടി20 ഫോര്‍മാറ്റിലെ ഏറ്റവും മികച്ച മാച്ച് വിന്നര്‍മാരില്‍ ഒരാളാണ് അദ്ദേഹം. തനിച്ച് ടീമിനെ വിജയിപ്പിക്കാനുള്ള അസാധാരണ മികവ് ഡിവില്ലിയേഴ്‌സിനുണ്ട്.
Read more
ഐ.പി.എല്‍ കരിയറിലുടനീളം ഒരേയൊരു ടീമിനു വേണ്ടി കളിച്ചിട്ടുള്ള ഏക താരമാണ് കോഹ്‌ലി. ഐ.പി.എല്‍ ചരിത്രത്തിലെ ഓള്‍ടൈം റണ്‍വേട്ടക്കാരനും കൂടിയായ താരത്തെ ഏതായാലും ബാംഗ്ലൂര്‍ കൈവിടില്ല. ടീം നിലനിര്‍ത്തിയേക്കാവുന്ന മൂന്നാമത്തെ താരം ആരെന്ന കാര്യത്തില്‍ വ്യക്തതയില്ല. കോഹ്‌ലിക്ക് പ്രിയങ്കരനായ മുഹമ്മദ് സിറാജിനാണ് സാധ്യത കൂടുതല്‍.
