ഒഎൻജിസിയുടെ സിഎസ്ആർ ഫണ്ട് കാവിവൽക്കരിക്കപ്പെടുന്നു; 10 വർഷം, 20 സംഘടനകൾ, സംഘപരിവാറിലേക്ക് ഒഴുകിയത് 668 കോടി.

രാജ്യത്തെ പ്രമുഖ പൊതുമേഖലാ സ്ഥാപനമായ ഓയിൽ ആൻഡ് നാച്ചുറൽ ഗ്യാസ് കോർപ്പറേഷൻ (ONGC) കഴിഞ്ഞ പത്ത് വർഷത്തിനിടെ ആർ.എസ്.എസുമായി ബന്ധമുള്ള സംഘടനകൾക്ക് കോർപ്പറേറ്റ് സോഷ്യൽ റെസ്പോൺസിബിലിറ്റി (CSR) ഫണ്ടിൽ നിന്ന് നൽകിയത് 668 കോടിയിലധികം രൂപയെന്ന് റിപ്പോർട്ട്. സംഘപരിവാർ ബന്ധമുള്ള 20 സംഘടനകൾക്കാണ് ഇത്രയും ഭീമമായ തുക സി.എസ്.ആർ ഫണ്ടായി ലഭിച്ചതെന്ന വാർത്ത വലിയ വിവാദങ്ങൾക്കാണ് തിരികൊളുത്തിയിരിക്കുന്നത്. വാർത്താ പോർട്ടലുകളായ ‘ന്യൂസ് മിനുട്ട്’, ‘ന്യൂസ് ലോൺട്രി’ എന്നിവ സംയുക്തമായി നടത്തിയ അന്വേഷണത്തിലാണ് ഞെട്ടിക്കുന്ന ഈ കണക്കുകൾ പുറത്തുവന്നിരിക്കുന്നത്.

​2013 മുതൽ 2025 വരെയുള്ള കാലയളവിൽ ഒഎൻജിസി നൽകിയ മൊത്തം സി.എസ്.ആർ ഫണ്ടിന്റെ 14.7 ശതമാനവും ലഭിച്ചിരിക്കുന്നത് ഈ 20 സംഘടനകൾക്കാണെന്ന് റിപ്പോർട്ടുകൾ വ്യക്തമാക്കുന്നു. ഏറ്റവും ശ്രദ്ധേയമായ കാര്യം, ഇതിൽ ഉൾപ്പെടുന്ന ഭൂരിഭാഗം സംഘടനകൾക്കും ഒരു കോടി രൂപയ്ക്ക് മുകളിലാണ് ഫണ്ട് ലഭിച്ചിരിക്കുന്നത് എന്നതാണ്. ഒരു കോടി രൂപയ്ക്ക് താഴെ സഹായം ലഭിച്ച ആർ.എസ്.എസ് അനുകൂല സംഘടനകളുടെ കണക്കുകൾ ഒഴിവാക്കിയാണ് ഈ 668 കോടിയുടെ റിപ്പോർട്ട് തയ്യാറാക്കിയിരിക്കുന്നത്. ഫണ്ട് ലഭിച്ച 20 സംഘടനകളിൽ ഒമ്പതെണ്ണവും ആർ.എസ്.എസുമായി നേരിട്ട് ബന്ധമുള്ളവയാണ്. ഈ പട്ടികയിൽ രണ്ടാമതായി ഏറ്റവും കൂടുതൽ തുക കൈപ്പറ്റിയത് നാഗ്പൂർ ആസ്ഥാനമായി പ്രവർത്തിക്കുന്ന ഒരു നോൺ പ്രോഫിറ്റ് ചാരിറ്റബിൾ ട്രസ്റ്റാണ്. ആർ.എസ്.എസിന്റെ രണ്ടാമത്തെ സർസംഘചാലകായിരുന്ന എം.എസ് ഗോൾവാൾക്കറുടെ പേഴ്സണൽ അസിസ്റ്റൻ്റിന്റെ പേരിലുള്ളതാണ് ഈ ട്രസ്റ്റ്. അവശേഷിക്കുന്ന 18 സംഘടനകൾക്കായി ഒരു കോടി മുതൽ 15 കോടി രൂപ വരെയാണ് ഓരോന്നിനും ഗ്രാന്റായി നൽകിയിട്ടുള്ളത്.

​2013-നും 2015-നും ഇടയിൽ ഈ സംഘടനകളിൽ മൂന്നെണ്ണത്തിന് മാത്രമാണ് ഒഎൻജിസി ഫണ്ട് നൽകിയത്. അന്ന് നൽകിയതാകട്ടെ കേവലം 3 കോടി രൂപയിൽ താഴെ മാത്രമായിരുന്നു. എന്നാൽ തുടർന്നുള്ള പത്ത് വർഷങ്ങളിലാണ്, അതായത് കേന്ദ്രത്തിൽ എൻ.ഡി.എ സർക്കാർ അധികാരത്തിൽ വന്ന ശേഷമാണ്, ഈ ഫണ്ട് വിതരണം വലിയ തോതിൽ വർധിച്ചതെന്ന് അന്വേഷണ റിപ്പോർട്ടിൽ ചൂണ്ടിക്കാണിക്കുന്നു.
​രാജ്യത്തെ ഒരു പൊതുമേഖലാ സ്ഥാപനത്തിന്റെ സാമൂഹിക ഉത്തരവാദിത്ത ഫണ്ട് ഒരു പ്രത്യേക പ്രത്യയശാസ്ത്ര പശ്ചാത്തലമുള്ള സംഘടനകൾക്ക് മാത്രം വലിയ തോതിൽ നൽകുന്നതിലെ സുതാര്യതയാണ് ഇപ്പോൾ ചോദ്യം ചെയ്യപ്പെടുന്നത്.

സർക്കാരിന്റെയും പൊതുമേഖലാ സ്ഥാപനങ്ങളുടെയും നിഷ്പക്ഷതയെ ഇത് ബാധിക്കുമെന്ന് രാഷ്ട്രീയ നിരീക്ഷകർ വിലയിരുത്തുന്നു. സംഘടനകളെ സി.എസ്.ആർ ഫണ്ടിനായി തിരഞ്ഞെടുത്തതിന്റെ മാനദണ്ഡങ്ങൾ എന്താണെന്ന് സർക്കാരും ഒഎൻജിസിയും വ്യക്തമാക്കണമെന്ന ആവശ്യം ശക്തമാകുകയാണ്. വിഷയത്തിൽ സ്വതന്ത്ര അന്വേഷണം വേണമെന്നും ഫണ്ട് വിനിയോഗം സംബന്ധിച്ച മുഴുവൻ വിവരങ്ങളും പുറത്തുവിടണമെന്നും വിവിധ പ്രതിപക്ഷ പാർട്ടികളും സംഘടനകളും ഇതിനകം ആവശ്യപ്പെട്ടിട്ടുണ്ട്.