തിരഞ്ഞെടുപ്പ് നടക്കുകയാണെങ്കില്‍ മോദി സര്‍ക്കാര്‍ പാകിസ്ഥാനിലേക്ക് സര്‍ജിക്കല്‍ സ്‌ട്രൈക്ക് നടക്കും; വിമര്‍ശനവുമായി കോണ്‍ഗ്രസ്

പാകിസ്ഥാന്‍ തീവ്രവാദ ക്യാമ്പിലേക്ക് ഇന്ത്യ നടത്തിയ പ്രത്യാക്രമണം സര്‍ക്കാറിന്റെ തിരഞ്ഞെടുപ്പ് തന്ത്രമാണെന്ന് കോണ്‍ഗ്രസ്. രാജ്യത്ത് ഏതെങ്കിലും സംസ്ഥാനത്ത് തിരഞ്ഞെടുപ്പ് നടക്കുകയാണെങ്കില്‍ മോദി സര്‍ക്കാര്‍ ഉടനെ പാകിസ്ഥാനിലേക്ക് സര്‍ജിക്കല്‍ സ്‌ട്രൈക്ക് നടക്കുമെന്ന് കോണ്‍ഗ്രസ് നേതാവ് അഖിലേഷ് സിംഗ് ആരോപിച്ചു.

മോദി സര്‍ക്കാരിന്റെ കാലത്തെ പുതിയ തിരഞ്ഞെടുപ്പ് പാറ്റേണ്‍ ആണിത്. ഹരിയാനയിലും മഹാരാഷ്ട്രയിലും നാളെ തിരഞ്ഞെടുപ്പ് നടക്കാന്‍ പോവുകയാണ്. കേന്ദ്രസര്‍ക്കാരിന് രാജ്യം നേരിടുന്ന പ്രധാന പ്രശ്‌നങ്ങളില്‍ നിന്നും ജനങ്ങളുടെ ശ്രദ്ധ തിരിക്കണം. അതിനാണ് ഇത്തരം ആക്രമണങ്ങള്‍ നടത്തുന്നതെന്നും അദ്ദേഹം ആരോപിച്ചു. ഇപ്പോള്‍ രാജ്യത്തിന്റെ രാഷ്ട്രീയം നിര്‍ണയിക്കുന്നത് സര്‍ജിക്കല്‍ സ്‌ട്രൈക്കുകളാണ് അഖിലേഷ് സിംഗ് കുറ്റപ്പെടുത്തി.

തിരഞ്ഞെടുപ്പില്‍ പരാജയം മണത്ത് കോണ്‍ഗ്രസ് അടിസ്ഥാന രഹിതമായ ആരോപണവുമായി രംഗത്തെത്തിയിരിക്കുകയാണെന്ന് ബിജെപി ദേശീയ വക്താവ് ഷനവാസ് ഹുസൈന്‍ തിരിച്ചടിച്ചു. ഹരിയാനയിലും മഹാരാഷ്ട്രയിലും കോണ്‍ഗ്രസ് തകര്‍ന്നടിയുമെന്ന് അദ്ദേഹം പറഞ്ഞു.