വധുവിനെ ആവശ്യമുണ്ട്; വൈറലായി യുവാവിന്റെ വിവാഹ പോസ്റ്റർ

വധുവിനെ ആവശ്യമുണ്ടെന്ന് നാട് ഒട്ടാകെ പോസ്റ്ററൊട്ടിച്ച് യുവാവ്. തമിഴ്‌നാട് മധുര വില്ലുപുരം സ്വദേശിയായ എം എസ് ജഗൻ എന്ന ഇരുപത്തിയേഴുകാരനാണ് വധുവിനെ തേടി നഗരത്തിലുടനീളം പോസ്റ്റർ പതിപ്പിച്ചത്. അഞ്ചു വർഷമായി കല്ല്യാണം അലോചിച്ചിട്ട് നടക്കാത്തതിനെ തുടർന്നാണ് താൻ ഇങ്ങനെ ഒരു മാർ​ഗം കണ്ടെത്തിയതെന്നാണ് ജ​ഗൻ പറയുന്നത്.

പോസ്റ്ററുകളിൽ ജഗന്റെ ഫോട്ടോയും പേരും, ജാതി, ശമ്പളം, തൊഴിൽ, വിലാസം, തനിക്കുള്ള ഭൂമി തുടങ്ങിയ വിശദാംശങ്ങളും ചേർത്തിട്ടുണ്ട്. പാർട്ട് ടൈം ഡിസൈനറായി ജോലി നോക്കുന്ന ജ​ഗൻ ഇതുപോലെയുള്ള ഒരുപാട് പോസ്റ്ററുകൾ ഡിസൈൻ ചെയ്യുന്നുണ്ട്.

അപ്പോഴാണ് എന്തുകൊണ്ടാണ് തനിക്കായിത്തന്നെ ഇങ്ങനെ ഒരു പോസ്റ്റർ ഡിസൈൻ ചെയ്ത് പെണ്ണന്വേഷിച്ച് കൂടാ എന്ന് ചിന്തിക്കുന്നത്. എന്നാൽ, പോസ്റ്ററും വിചാരിച്ച പോലെ ജ​ഗനെ സഹായിച്ചില്ല.

പെൺകുട്ടികളിൽ നിന്നോ അവരുടെ രക്ഷിതാക്കളിൽ നിന്നോ വിളി വരുമെന്ന് പ്രതീക്ഷിച്ച ജ​ഗന് വന്നതെല്ലാം ബ്രോക്കർമാരിൽ നിന്നുമുള്ള കോളുകളാണ്. മാത്രമല്ല, ഈ പോസ്റ്ററിന്റെ പേരിൽ ഓൺലൈനിൽ ആളുകൾ ജ​ഗനെ കണക്കിന് കളിയാക്കുകയും ചെയ്തു. എന്നാൽ, അതൊന്നും താൻ കാര്യമാക്കുന്നില്ലെന്നും അവരുടെ ചെലവിൽ താൻ വൈറലായല്ലോ എന്നുമാണ് ജ​ഗൻ  മറുപടി പറയുന്നത്..