എതിരാളികള്‍ ഇല്ലെങ്കില്‍ എന്തിനാണ് മോദിയും അമിത് ഷായും ഇത്രയധികം റാലികള്‍ നടത്തുന്നത്: ശിവസേന

മഹാരാഷ്ട്ര നിയമസഭാ തിരഞ്ഞെടുപ്പ് വേള യില്‍ ബി.ജെ.പി നേതാക്കളുടെ റാലികള്‍ക്കെതിരെ വിമര്‍ശനവുമായി ശിവസേന രംഗത്ത്. ശക്തമായ എതിരാളികള്‍ ഇല്ലെങ്കില്‍ എന്തിനാണ് പ്രധാനമന്ത്രി മോദിയും ആഭ്യന്തരമന്ത്രി അമിത് ഷായും ഇത്രയധികം റാലികള്‍ നടത്തുന്നതെന്ന് ശിവസേന എം.പി സഞ്ജയ് റാവുത്ത് മുഖപത്രമായ സാനയിലെ ലേഖനത്തിലൂടെ ചോദിച്ചു.

“തിരഞ്ഞെടുപ്പ് പ്രചാരണത്തില്‍ പ്രതിപക്ഷത്തെ കാണാന്‍ പോലുമില്ലെന്നായിരുന്നു മുഖ്യമന്ത്രി ആവര്‍ത്തിച്ചു പറഞ്ഞത്. എന്നാല്‍ പ്രധാനമന്ത്രി മോദിയെയും കേന്ദ്രമന്ത്രി അമിത്ഷായെയും മുന്നില്‍നിര്‍ത്തി 100 കണക്കിന് റാലികള്‍ക്ക് ഫഡ്‌നവിസ് മഹാരാഷ്ട്രയില്‍ നേതൃത്വം നല്‍കിയതെന്തിനാണ്”- ലേഖനത്തില്‍ പറയുന്നു.

ബിജെപി മുന്നണിയെ എതിരിടാന്‍ കെല്‍പുള്ള പ്രതിപക്ഷം സംസ്ഥാനത്തില്ലെന്ന് അടുത്തിടെ മുഖ്യമന്ത്രി ഫഡ്‌നവിസ് അവകാശ വാദം ഉന്നയിച്ചിരുന്നു. ഇതിനുള്ള പരോക്ഷ മറുപടി കൂടിയാണ് സാംനയിലെ ലേഖനത്തിലൂടെ ശിവസേന നല്‍കിയത്.